Buyuk Britaniyada 30-iyul kuni musulmonlarga qarshi namoyish uyushtirgan fuqarolar harakati politsiya ishtirokidagi ommaviy to‘qnashuvlarga aylanib ketdi. Bu haqda Reuters nashri xabar berdi.
Manbada aytilishicha, keskinlik 29-iyul kuni Sautport shahrida yuz bergan qotillik oqibatida kelib chiqqan. Bu shaharchada o‘tkazilgan konsert paytida nomaʼlum o‘spirin jinoyat sodir etib, uch nafar bolani pichoqlab o‘ldirgan, yana besh nafar bola og‘ir jarohat bilan kasalxonaga olib ketilgan.
Sautport aholisi qotillikda musulmon jamoasidan gumon qilgan. O‘ldirilgan bolalarning qarindoshlari hamda ularga qo‘shilganlar ishtirokidagi norozilik harakatlari tartibsizliklarga aylanib ketgan.
Namoyishchilar dastlab ko‘chadagi musulmon aholi vakillariga nisbatan zo‘ravonliklar sodir etgan. Keyinchalik Sautportdagi masjidga hujum qilgan.
Britaniya rasmiylari musulmonlarga qarshi namoyishlarni “Angliya mudofaa ligasi” tashkiloti qo‘llab-quvvatlagani va tashkil etishda yordam berganini maʼlum qilgan. Ushbu tashkilot milliy siyosat yuritishni talab qiladi hamda Britaniyani o‘zgacha din va millat vakillaridan “tozalash”ni daʼvo qilib keladi.
Namoyishchilarni to‘xtatish uchun politsiya safarbar qilinishi norozilik ko‘lamini battar oshirib yuborgan. Fuqarolar politsiya mashinalariga hujum qilgan, xodimlarga shikast yetkazilgan. Markaziy ko‘chalarda ko‘plab avtomobillar yoqib yuborilgan. Namoyishchilar “Biz vatanimizni qaytarishni xohlaymiz” deb yozilgan shiorlar ko‘tarib shaharda marsh tashkil etgan.
Namoyishchilarga maxsus murojaat eʼlon qilgan politsiya departamenti qotillik sodir etgan shaxs musulmon jamoasidan emasligini maʼlum qilgan. Ushbu jinoyatni sodir etishda gumonlangan 17 yoshli shotland millatiga mansub Buyuk Britaniya fuqarosi hibsga olingani aytilgan.
Politsiya namoyishchilardan asossiz maʼlumotlarga ishonib harakat qilmaslik hamda o‘zga din vakillariga nisbatan hujum sodir etmaslikni so‘ragan. Rasmiylar tegishli tergov tadbirlari o‘tkazayotgani, aybdorlar qonun doirasida jazoga tortilishi vaʼda qilingan.
Politsiya jinoyatda ayblab hibsga olingan o‘smirning ismini oshkor qilmagan. U bu ishga nima uchun qo‘l urgani ham hozircha nomaʼlum.
Izoh (0)