AQSH prezidentligiga nomzod Donald Tramp va AQSH vitse-prezidenti Kamala Harris o‘rtasidagi 10-sentyabrga belgilangan debat mikrofon qoidalari bo‘yicha kelishmovchiliklar tufayli o‘tkazilmasligi mumkin. Bu haqda tegishli manbalarga tayanib, CNN xabar berdi.
“Sobiq prezident Donald Trampning saylovoldi kampaniyasi qoidalar bo‘yicha kelishmovchilik tufayli 10-sentyabr kuni ABC telekanalida debat o‘tkazish imkoniyatini shubha ostiga qo‘ymoqda”, deyiladi telekanal xabarida.
Telekanal suhbatdoshining so‘zlariga ko‘ra, Tramp saylovoldi kampaniyasi Tramp gapirayotganda raqibining mikrofoni o‘chirilishini istaydi. Bu qoida Trampning AQSH prezidenti Jo Bayden bilan birinchi debatida ham amal qilgandi.
“O‘yinlar yetadi! Biz ABC telekanalidagi debatni CNN telekanalidagi kabi shartlar asosida o‘tkazishga kelishib oldik”, deydi Trampning katta maslahatchisi Jeyson Miller.
Harris jamoasi bahsni o‘tkazmoqchi bo‘lgan ABC va boshqa televizion tarmoqlar bilan bog‘lanib, ishtirokchilarning mikrofonlari butun efir davomida yoqilgan bo‘lishi kerakligini aytgan. Harrisning saylovoldi kampaniyasida aytilishicha, Tramp jamoasi go‘yoki o‘z nomzodi 90 daqiqa davomida o‘zini “prezidentga munosib” tuta olmasligidan xavotirda.
Bir kun avval Tramp ABC News telekanalida Harris bilan munozara o‘tkazish g‘oyasini uning efirida “Trampni yomon ko‘radiganlar” paydo bo‘lgani sababli shubha ostiga qo‘ydi. Trampning qo‘shimcha qilishicha, telekanalga Harrisning “eng yaqin do‘sti” rahbarlik qiladi. Tramp, shuningdek, Harris Fox News, NBC, CBS va CNN kabi telekanallarda u bilan bahslashishdan bosh tortganini qo‘shimcha qilgan.
Izoh (0)