“Ukraina bilan muzokaralar mavzusi o‘z dolzarbligini yo‘qotdi” — Peskov

Ayni paytda Ukraina bilan muzokaralar mavzusi “o‘z dolzarbligini yo‘qotdi”, deya Rossiya prezidenti matbuot kotibi Dmitriy Peskov xabar berdi.

“Turli aloqalar haqida ko‘plab xabarlar chop etilmoqda va ularning hammasi ham haqiqat emas”, deydi Peskov.

Avvalroq prezident yordamchisi Yuriy Ushakov Rossiyaning tinch yo‘l bilan kelishuv bo‘yicha takliflari bekor qilinmaganini, biroq hozircha Kursk viloyatidagi janglar tufayli muzokaralar haqida so‘z yuritilmaganini aytgan.

Ushakovning fikricha, endi “muzokaralar jarayoniga kirishish o‘rinsiz bo‘ladi” va muloqotning kelajagi vaziyatga, jumladan, jang maydoniga bog‘liq.

Kursk viloyatidagi janglar 6-avgustdan beri deyarli uch hafta davom etmoqda. Ukraina rasmiylari mintaqaga bostirib kirishni kelajakdagi muzokaralar pozitsiyasini yaxshilash istagi bilan izohlagan. The Guardian manbalari Rossiya hududiga uzoq masofali qurollar bilan zarba berishni Moskvani muloqotga ko‘ndirishning yana bir usuli sifatida baholagan.

The Washington Post nashriga ko‘ra, Rossiya va Ukraina delegatsiyalari Qatarda mojaroga barham berish bo‘yicha keng qamrovli kelishuv bo‘yicha o‘zaro tushunishga erishish, shuningdek, ikki oy davomida bir-birining energetika obyektlariga hujum qilmaslikka kelishib olish uchun uchrashishni rejalashtirgan. Ammo Ukraina armiyasining Kursk viloyatidagi amaliyoti tufayli yig‘ilishga tayyorgarlik jarayoni to‘xtatilgan.

Rossiya TIVning taʼkidlashicha, bunday muzokaralar “bo‘lmagan va kelgusida ham bo‘lmaydi”.