Falastin Qozondagi tashkilot sammitidan so‘ng BRIKSga a’zo bo‘lish so‘rovini yuborishi mumkin. Bu haqda Falastinning Moskvadagi elchisi Abdulhafiz Nofal ma’lum qildi.
“Sammitdagi birinchi ishtirokimizdan so‘ng biz ushbu uyushmaga a’zo bo‘lish uchun so‘rov yuboramiz”, deydi u.
Nofalning ta’kidlashicha, Rossiya prezidenti Vladimir Putin Falastin yetakchisi Mahmud Abbosga BRIKS sammiti doirasida to‘liq Falastinga bag‘ishlangan sessiya bo‘lishini va’da qilgan. Diplomat sammitdan ijobiy umidlar borligini qayd etgan.
Avvalroq Nofal Putin Abbosni Qozondagi BRIKS sammitiga taklif qilgani, biroq Falastin prezidentining sammitda ishtirok etishi hozircha aniq emasligini aytgan. Biroq u Falastin tomoni ishtirok etish niyatida ekanini ma’lum qilgan. Diplomatning so‘zlariga ko‘ra, sammitga Falastin bosh vaziri Muhammad Mustafo ham kelishi mumkin.
BRIKS — norasmiy davlatlararo uyushma bo‘lib, hozirda 10 ta davlatni o‘z ichiga oladi. U 2006-yilda Rossiya tashabbusi bilan tashkil etilgan, uning asoschilari Braziliya, Rossiya, Hindiston, Xitoy va Janubiy Afrika davlatlari nomidagi bosh harflarning inglizcha qisqartmasi asosida BRICS bo‘lib shakllangan.
Tashkilotning asosiy maqsadi – har bir davlatda moliyaviy va ijtimoiy barqarorlikni ta’minlash, o‘zaro manfaatli hamkorlik platformasini yaratishdan iborat. BRIKS turli geografik joylashuvga ega bo‘lgan mamlakatlarni birlashtirgani bois, bu hamkorlikning transkontinental ko‘lamini belgilaydi.
Izoh (0)