Pokistonning Balujiston viloyatidagi trassada sodir etilgan qurolli hujumda kamida 60 kishi halok bo‘ldi.
Pokiston OAVga ko‘ra, qurollangan shaxslar kechasi Musaxayl okrugining Rarasham hududida yo‘lni to‘sib qo‘ygan, yo‘lovchilarni avtobus va yuk mashinalaridan tushirib, hujjatlarini tekshirgan va keyin ularga qarata o‘q uzgan.
Shuningdek, jangarilar kamida o‘nta mashinaga o‘t qo‘ygan. Qayd etilishicha, qurbonlar panjoblik yo‘lovchilar bo‘lgan.
Voqea sodir bo‘lgan hududga politsiya va tez yordam mashinalari yetib kelgan, yaradorlar va halok bo‘lganlarning jasadlari yaqin atrofdagi shifoxonalarga yetkazilgan.
Pokiston prezidenti Osif Ali Zardoriy va bosh vazir Shahboz Sharif hujumni qoralab, Pokiston hukumati terrorizmga qarshi kurashishda qat’iy ekanini ta’kidlagan. Sharif terrorchilar munosib jazolanishiga ishontirgan.
Balujiston bosh vaziri Sarfaraz Bugti ham tinch aholiga uyushtirilgan teraktni qoralab, jangarilar qo‘lga olinishini aytgan.
So‘nggi yillarda Pokistonda terror hujumlari tez-tez sodir bo‘lmoqda. Hujumlar ko‘pincha Afg‘oniston bilan chegaradosh Xayber-Paxtunxva va Balujiston viloyatlarida kuzatiladi.
Islomobod pokistonlik “Tolibon” Afg‘onistondan hujumlar uyushtirayotganini da’vo qilmoqda. Kobul bu ayblovlarni rad etgan.
Hujumlar, shuningdek, Balujiston viloyatining Pokistondan ajralib chiqib, balujlar nazoratiga o‘tishini talab qilayotgan Balujiston ozodlik armiyasi (BOA) tomonidan amalga oshirilayotgani qayd etilgan.
Izoh (0)