Hindiston bosh vaziri Narendra Modi Kiyevga tashrifi chog‘ida Ukraina prezidenti Vladimir Zelenskiyga Hindiston va o‘zi shaxsan mojaroni hal qilishga hissa qo‘shishga tayyorligini ma’lum qildi.
Sizni ishontirib aytamanki, Hindiston tinchlikka erishish yo‘lida hissa qo‘shishga tayyor. Men shaxsan tinchlikka erishish uchun do‘st sifatida har qanday rolni o‘ynashga tayyorman, deya Modi so‘zlarini keltiradi Reuters nashri.
Hindiston TIV rahbari Subrahmanyam Jayshankar bosh vazir Dehlining mojaroni hal qilish uchun “muloqot va diplomatiya” bo‘yicha pozitsiyasini yana bir bor tasdiqlagan. Modi Zelenskiy bilan o‘tgan oyda Rossiya prezidenti Vladimir Putin bilan bo‘lib o‘tgan suhbatini ham muhokama qilgan.
Hindiston har ikki tomon yechim topish uchun bir-biri bilan hamkorlik qilishi kerak, deb hisoblaydi, deydi Jayshankar. Uning qo‘shimcha qilishicha, Modi Zelenskiyni Hindistonga tashrif buyurishga taklif qilgan.
Bu Hindiston va Ukraina o‘rtasida diplomatik munosabatlar o‘rnatilgan 1992-yildan beri Hindiston bosh vazirining birinchi tashrifidir.
Hindiston bosh vaziri Ukrainaga 23-avgust kuni ertalab tashrif buyurgan edi. Kiyevda u Zelenskiy bilan uchrashgan. Mamlakat rahbarlari Ukrainadagi mojarodan tashqari, iqtisodiy aloqalarni mustahkamlash masalalarini ham muhokama qilgan. UNIAN xabariga ko‘ra, Hindiston va Ukraina o‘rtasida to‘rtta ikki tomonlama hujjat imzolangan, ulardan biri dori vositalarining aylanishini nazorat qilish bilan bog‘liq.
Bloomberg’ga ko‘ra, Hindiston bosh vaziri Zelenskiy va Putin o‘rtasida xabarlar yuborishga rozi bo‘lgan, ammo mojaroga barham berish uchun vositachi bo‘lishni istamagan.
Hindiston hech qanday muammoni jang maydonida hal qilib bo‘lmasligiga qat’iy ishonadi, degan edi Modi Kiyevga tashrifi oldidan.
Izoh (0)