Ҳиндистон бош вазири Нарендра Моди Киевга ташрифи чоғида Украина президенти Владимир Зеленскийга Ҳиндистон ва ўзи шахсан можарони ҳал қилишга ҳисса қўшишга тайёрлигини маълум қилди.
Сизни ишонтириб айтаманки, Ҳиндистон тинчликка эришиш йўлида ҳисса қўшишга тайёр. Мен шахсан тинчликка эришиш учун дўст сифатида ҳар қандай ролни ўйнашга тайёрман, дея Моди сўзларини келтиради Reuters нашри.
Ҳиндистон ТИВ раҳбари Субраҳманям Жайшанкар бош вазир Деҳлининг можарони ҳал қилиш учун “мулоқот ва дипломатия” бўйича позициясини яна бир бор тасдиқлаган. Моди Зеленский билан ўтган ойда Россия президенти Владимир Путин билан бўлиб ўтган суҳбатини ҳам муҳокама қилган.
Ҳиндистон ҳар икки томон ечим топиш учун бир-бири билан ҳамкорлик қилиши керак, деб ҳисоблайди, дейди Жайшанкар. Унинг қўшимча қилишича, Моди Зеленскийни Ҳиндистонга ташриф буюришга таклиф қилган.
Бу Ҳиндистон ва Украина ўртасида дипломатик муносабатлар ўрнатилган 1992 йилдан бери Ҳиндистон бош вазирининг биринчи ташрифидир.
Ҳиндистон бош вазири Украинага 23 август куни эрталаб ташриф буюрган эди. Киевда у Зеленский билан учрашган. Мамлакат раҳбарлари Украинадаги можародан ташқари, иқтисодий алоқаларни мустаҳкамлаш масалаларини ҳам муҳокама қилган. UNIAN хабарига кўра, Ҳиндистон ва Украина ўртасида тўртта икки томонлама ҳужжат имзоланган, улардан бири дори воситаларининг айланишини назорат қилиш билан боғлиқ.
Bloomberg’га кўра, Ҳиндистон бош вазири Зеленский ва Путин ўртасида хабарлар юборишга рози бўлган, аммо можарога барҳам бериш учун воситачи бўлишни истамаган.
Ҳиндистон ҳеч қандай муаммони жанг майдонида ҳал қилиб бўлмаслигига қатъий ишонади, деган эди Моди Киевга ташрифи олдидан.
Изоҳ (0)