“Ўзбекистон — 2030” стратегиясида экспорт ҳажмини 45 миллиардга, ялпи ички маҳсулотни 160 миллиардга, туристлар сонини 15 миллионга, инвестициялар ҳажмини 250 миллиардга олиб чиқиш белгиланган. Бу қай даражада реалликка яқин? Буни бажариш мумкинми?
Ушбу саволларга “Дарё” билан суҳбат вақтида Стратегик ислоҳотлар агентлиги директорининг биринчи ўринбосари Абдулла Абдуқодиров ва Иқтисодиёт ассамблеяси раиси Мухтор Умаров жавоб берди.
Абдулла Абдуқодировнинг фикрича, рақамлар иккинчи даражали аҳамиятга эга бўлиши, биринчи навбатда инсон учун қадрли бўлган нарсалар ҳақида кўпроқ ўйлашимиз керак.
“Бугун 2024 йилнинг ўртасига келиб Ўзбекистон ялпи ички маҳсулоти 101 миллиард долларга чиқди. 160 миллиардга ҳам шундай қилиб чиқишимиз мумкин. Яъни бу фақат рақамлар бўлгани учун нарх-навони шишириб, қилишни иложи бор. Лекин маҳсулотларни физик ҳажми шундай тураверади. Бундай рақамларни мақсад қилиб қўйишимиз қанчалик тўғри? Назаримда, бошқача мақсадларни олдимизга қўйишимиз керак эди, яъни инсон учун қадрли бўлган нарсалар ҳақида кўпроқ ўйлашимиз зарур. Бундай рақамлар иккинчи даражали аҳамиятга эга”, дейди Абдулла Абдуқодиров.
Иқтисодиёт ассамблеяси раиси Мухтор Умаров эса экспорт, туристлар оқими ва ялпи ички маҳсулотни хусусий сектор яратишини, шу боисдан ҳукумат “Ўзбекистон — 2030” стратегиясида қўйилган мақсадларга эришиш учун хусусий сектор билан келишиб олиши зарурлигини айтиб ўтди.
“Ҳукумат “Ўзбекистон — 2030” стратегиясида қўйилган мақсадларга эришаман деса, хусусий сектор билан келишиб олиши керак. Чунки экспорт, туристлар оқими ва ялпи ички маҳсулотни хусусий сектор яратади. Ҳозир биз бунинг аксини кўрмоқдамиз. Йўлларимиз айро бўлиб қолган.
Менимча, “Ўзбекистон — 2030” стратегиясида қўйилган мақсадларга эришиш учун кичик ва ўрта бизнес кесимида чет эл компанияларини Ўзбекистонга таклиф қилиш керак. Масалан, IT Parkда чет эл IT компаниялари учун махсус ҳудудлар ташкил қилинди ва имтиёзлар берилди. Натижада Қозоғистондан, Қирғизистондан, Россия ва Украинадан IT компаниялари ўз резиденсиясини Ўзбекистонга олиб келди. Нега биз бошқа соҳаларга шундай комплекс тарзда ёндаша олмаяпмиз? Ахир, жалб қилсак бўлади-ку”, деди Мухтор Умаров.
Маълумот ўрнида, “Ўзбекистон — 2030” стратегияси давлат раҳбарининг 2023 йил 11 сентябрдаги ПФ–158-сонли фармони билан тасдиқланган. Унинг мақсадлари қаторига 2030 йилга қадар иқтисодиёт ҳажмини 2 баробар ошириш ва “даромади ўртачадан юқори бўлган давлатлар” қаторига кириш каби муҳим вазифалар белгилаб берилган.
Изоҳ (0)