Samarqand viloyati Nurobod tumanida Angliyaga ishga yuborishni va’da qilgan firibgar ushlandi, deb xabar bermoqda Prokuratura departamenti axborot xizmati.
Unga ko‘ra, holat Bosh prokuratura huzuridagi departamentning Nurobod tuman bo‘limi tomonidan fuqarolarning huquq va manfaatlarini himoya qilish yuzasidan o‘tkazilgan tergovga qadar tekshiruvda aniqlangan. Fuqaro E.X. go‘yoki Angliyadagi firmada ishlovchi tanishlari yordamida 5 nafar fuqaroni ushbu davlatga ishga yuborishini va’da qilib, ularning jami 10 400 AQSH dollarini firibgarlik yo‘li bilan qo‘lga kiritilgan.
Mazkur holat yuzasidan Jinoyat kodeksining 168-moddasi (firibgarlik) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Samarqand viloyatining Oqdaryo tumanida xorijga ishga yuborishini aytib 49 kishidan pul olgan shaxs ushlangan edi. Shuningdek, Payariq tumanida AQSHga ishga bormoqchi bo‘lgan ikki kishi 24 ming dollarga chuv tushgan.
AQSHga noqonuniy borish
AQSH—Meksika chegarasi orqali Amerikaga kirishga urinayotgan O‘zbekiston fuqarolariga 2023-yilning noyabrida ogohlantirish e’lon qilinib, unda noqonuniy kirayotgan fuqarolar AQSHga qo‘yib yuborilmasligi, immigratsiya ishi hal qilingunga qadar hibsda saqlanishi ma’lum qilingandi.
O‘sha yilning dekabrida AQSHga noqonuniy yo‘llar bilan ketgan 119 nafar o‘zbekistonlik vatanga qaytarilgan edi. 2024-yil mart oyida esa yana 74 nafar o‘zbekistonlik olib kelindi.
AQSHning O‘zbekistondagi elchixonasi noqonuniy migratsiya xavfli va serxarajat urinish ekanini bildirib, O‘zbekiston fuqarolarini odamlarni tovar sifatida ko‘radigan jinoiy guruhlar yolg‘on vaʼdalariga ishonib, jabrdiyda bo‘lishdan ogohlantirdi.
2021-yildan 2023-yilgacha O‘zbekistonning 13 600 nafar fuqarosi Meksika orqali AQSHga noqonuniy kirishga uringan.
Izoh (0)