Amerikalik afsonaviy bokschi, superog‘ir vaznda sobiq mutlaq jahon chempioni Mayk Tayson hamda bloger-bokschi Jeyk Pol o‘rtasidagi jang noyabr oyida bo‘lib o‘tadi.
Tayson va Pol jang oldidan o‘z fikrlarini bildirib o‘tdi.
Boks afsonasi Mayk Tayson Jeyk Polni nokautga uchratishni rejalashtirayotganini aytib o‘tdi.
“Jang bo‘ladimi? Ha, albatta, axir biz shu yeramiz-ku. Polni nokautga uchratishga tayyorlanyapman.
Yutuber tarixdagi eng buyuk bokschi bilan jang qilmoqchi (kuladi)”, — deydi Mayk.
Jeyk Pol esa Taysonning bokschilik faoliyatiga nuqta qo‘ymoqchiligini ma’lum qildi.
“Bu Tayson uchun og‘riqli saboq bo‘ladi. U mening boks bilan shug‘ullanishimga sababchi bo‘lganini doim ta’kidlaydi. Xo‘sh... Men esa unga ko‘rsatib qo‘yaman” — deb yozadi bloger Jeyk Pol.
Tayson—Pol jangi 15-noyabr kuni AQShning Arlington shahridagi A&T arenasida bo‘lib o‘tadi.
Dastlab, jang 20-iyulda bo‘lib o‘tishi aytilgandi. Mayk Mayamidan Los-Anjelesga uchayotgan vaqtida tibbiy xizmat xodimlariga murojaat qilgan. Qo‘nishga 30 daqiqa qolganda sportchi oshqozon yarasining ochilib ketishi oqibatida boshi aylangan va o‘zini juda noxush his qilgan.
Dastlab jang qoldirilgani aytilgandi. Biroq tashkilotchilar uni boshqa sanaga ko‘chirishni ma’qul topdi.
Tayson o‘z faoliyatini 2005-yilda yakunlagan. 1987-yildan 1990-yilgacha u og‘ir vazn toifasida mutlaq jahon chempioni bo‘lgan. Tayson 58 ta jang o‘tkazib, 50 tasida g‘alaba qozongan (44 tasi nokaut bilan) va 6 tasida mag‘lubiyat alamini totib ko‘rgan. Uning ishtirokidagi yana ikkita jang o‘tkazilmagan deb topilgan.
Izoh (0)