Boks bo‘yicha to‘rtta divizion sobiq chempioni Roy Jons boks afsonasi Mayk Taysonga qarshi revansh jangi imkoniyatlari ko‘rib chiqilmayotganini ma’lum qildi.
“Taysonga qarshi revansh kerak emas. U yaxshisi ringga umuman ko‘tarilmagani ma’qul”, — deydi Roy Jons.
Eslatib o‘tamiz, Jons va Mayk Tayson 2020-yilda ko‘rgazmali jangda ishtirok etgan. 8 raundlik jang durang bilan yakunlangan.
Tayson 15-noyabr kuni bloger Jeyk Polga qarshi ringga ko‘tariladi. Tayson—Pol jangi 20-iyul kuni AQShning Arlington shahridagi A&T arenasida bo‘lib o‘tishi kerak edi.
Mayk Mayamidan Los-Anjelesga uchayotgan vaqtida tibbiy xizmat xodimlariga murojaat qilgan. Qo‘nishga 30 daqiqa qolganda sportchi oshqozon yarasining ochilib ketishi oqibatida boshi aylangan va o‘zini juda noxush his qilgan.
Dastlab jang qoldirilgani aytilgandi. Biroq tashkilotchilar uni boshqa sanaga ko‘chirishni ma’qul topdi.
Tayson o‘z faoliyatini 2005-yilda yakunlagan. 1987-yildan 1990-yilgacha u og‘ir vazn toifasida mutlaq jahon chempioni bo‘lgan. Tayson 58 ta jang o‘tkazib, 50 tasida g‘alaba qozongan (44 tasi nokaut bilan) va 6 tasida mag‘lubiyat alamini totib ko‘rgan. Uning ishtirokidagi yana ikkita jang o‘tkazilmagan deb topilgan.
Izoh (0)