6-avgust kuni Maktabgacha va maktab taʼlimi vazirligi 1-sinf o‘quvchilariga beriladigan bepul o‘quv qurollarini hududlarga jo‘natishni boshladi. Bu haqda OAV vakillari uchun tashkil etilgan press-turda maʼlum qilindi, deya xabar berdi “Daryo” muxbiri.
Press–tur ishtirokchilari dastlab Toshkent viloyati Toshkent tumanidagi vazirlikka qarashli korxonada bo‘ldi.
Maʼlum qilinishicha, bu yilgi sovg‘alar 12 nomdagi o‘quv qurollari — portfel, yozuv va rasm daftarlari, akvarel bo‘yoqlari, rangli qog‘oz, qalamdon, ruchka, rangli qalam, oddiy qalam, plastilin, yelim va o‘chirg‘ich to‘plamidan iborat.
Maktabgacha va maktab taʼlimi vazirligi boshqarma boshlig‘i Erkin Murodovning aytishicha, sovg‘alar 719 366 nafar o‘quvchiga mo‘ljallangan.
“Hozirgacha 586 290 nafar (81,5 foiz) o‘quvchi 1-sinfga qabul qilindi. Maktablarga qabul jarayoni davom etmoqda. O‘quv qurollari respublikadagi barcha davlat va nodavlat maktablarga yetkaziladi. Bu yil mahsulotlar sifatiga alohida eʼtibor berildi. Avvalgi yillarda o‘g‘il va qiz bolalar uchun alohida ranglarda tayyorlangan bo‘lsa, yangi o‘quv qurollari barcha o‘quvchilarga bir xil rangda beriladi”, dedi vazirlik masʼuli.
“Prezident sovg‘asi” davlat byudjeti hisobidan xarid qilingan. O‘quv qurollari 20-avgustgacha respublikadagi barcha maktablarga to‘liq yetkaziladi.
Vazirlik maʼlumotlariga ko‘ra, 2024–2025-o‘quv yilida mamlakatdagi jami 10 182 ta davlat maktablarida 525 ming nafar o‘qituvchi 6,5 million nafardan ortiq o‘quvchilarga taʼlim berishi kutilmoqda. Yangi o‘quv yilida respublikadagi 37 548 ta (6867 ta davlat, 835 ta nodavlat, 1462 ta DXSH va 28 384 ta oilaviy) bog‘chalarida 2,3 million nafardan ortiq 3–7 yoshli bolalar qamrab olinadi. Bu maktabgacha taʼlim bilan qamrov darajasining 74,6 foizini tashkil etadi.
Joriy yilda O‘zbekistonda davlat dasturi asosida 608 ta maktabda qurilish–taʼmirlash ishlari amalga oshirilishi belgilangan. Xususan, yil davomida 30 ta yangi maktab qurilishi rejalashtirilgan. Shu bilan birga, 518 ta maktab rekonstruksiya qilinishi, 60 ta maktab mukammal taʼmirlanishi ko‘zda tutilgan. Natijada 180 mingdan ortiq yangi o‘quvchi o‘rinlari yaratilishi kerak.
Press–tur davomida OAV vakillari Toshkent shahri Chilonzor tumanidagi 126-maktab va 204-sonli MTT da bo‘ldi.
“Yangi o‘quv yilida 175 nafar bolani 1-sinfga qabul qilamiz. Maktabimiz 1 050 o‘quvchi o‘rniga mo‘ljallangan. Yangi o‘quv yilini 2 200 nafar o‘quvchi bilan boshlashni rejalashtirganmiz. Bolalar ikki smenada taʼlim oladi. Hozir maktabimizga boshlang‘ich sinf o‘quvchilari uchun “Prezident sovg‘asi” yetib keldi. Endi ularni bolajonlarga topshiramiz”, dedi 126-maktab direktori Muyassar Bahromova.
Toshkent shahridagi 204-sonli davlat bog‘chasi direktori Shahnoza Ahadovaning aytishicha, bu yil 100 nafar tarbiyalanuvchi maktab yoshiga yetgan.
“Maktabgacha taʼlim tashkilotimiz 840 o‘ringa mo‘ljallangan. Joriy yilda maktabgacha tayyorlov kurslarimizni 100 nafar bolalar bitirdi. Ular endi maktablarga qabul qilinadi. Biz yana 100 nafar bolani bog‘chamizga qabul qilish imkoniyatiga ega bo‘lamiz”, dedi bog‘cha mudirasi.
Vazirlikning maʼlum qilishicha, joriy yil yakunigacha respublikada bolalarning maktabgacha taʼlim bilan qamrov darajasini 76 foizga yetkazish reja qilingan. Xususan, 6 yoshli bolalarni maktabga tayyorlov tizimi bilan qamrab olish ko‘rsatkichi 96 foizga yetkazish belgilangan.
Izoh (0)