O‘zbekistonda 1,2 million o‘quvchi uchun maktab o‘rinlari yetishmaydi. Bu haqda Maktabgacha va maktab taʼlimi vazirligi boshqarma boshlig‘i Erkin Murodov “Daryo”ga bergan intervyusida maʼlum qildi.
Erkin Murodovning aytishicha, maktablarda besh milliontadan ortiq o‘quvchi o‘rni mavjud, lekin 6,4 million bola taʼlim olmoqda.
“Bugungi kunda davlat maktablarida 6,4 million nafar bola taʼlim oladi. Shundan 60 foizdan ortig‘i ikki smenada o‘qiydi. Ayni paytda maktablarda besh milliontadan ortiq o‘quvchi o‘rni mavjud. O‘rtadagi farq qariyb 1,2 millionta atrofida. Bu farqni qisqartirish uchun investitsiya dasturlari asosida maktablar qurish, qo‘shimcha o‘quvchi o‘rinlari yaratish ishlari amalga oshirilmoqda. Masalan, 2023-yilda 582 ta maktabda qurilish-taʼminlash ishlari bajarilib, 172 mingta o‘quvchi o‘rni yaratilgan. Joriy yilda ham 520 dan ortiq maktabda qurilish-taʼmirlash ishlari amalga oshirilib, 182 mingta qo‘shimcha o‘quvchi o‘rni yaratish maqsad qilingan”, dedi vazirlik vakili.
Erkin Murodov suhbat davomida maktablardagi sinflarda o‘quvchilarni o‘rtacha to‘ldirish meʼyori 25 nafarni tashkil etishini aytdi. Davlat standartiga ko‘ra, bitta sinfda o‘quvchilar sonini 35 nafardan oshirmaslik belgilangan.
“Respublikadagi davlat maktablarida jami 245 mingta sinflar mavjud. Shundan atigi ikki mingtasida o‘quvchilar soni 35 nafardan oshadi. Bu holat Toshkent shahri va viloyatlar markazlari, yangi qurilayotgan massivlarda, yaʼni aholi soni ko‘p hududlardagi maktablarda uchraydi. Sinfda 35 nafar o‘quvchi o‘qishi barcha fanlarga taalluqli emas. Bizda 10 dan ortiq fanlar ikki guruhga bo‘lib o‘qitiladi”, dedi vakilik rasmiysi.
Maʼlumot uchun, ayni paytda respublikada 10 182 ta davlat, 400 tadan ortiq nodavlat maktablar faoliyat yuritmoqda. Yangi o‘quv yili uchun qariyb 719 000 nafardan ortiq bolani 1-sinfga qabul qilish rejalashtirilgan. Joriy yil 15-iyul holatiga 521 000 nafardan ortiq bolalar boshlang‘ich sinfga olindi. Xususiy maktablarga esa 25 kun ichida 4 000 nafardan ko‘p o‘quvchi qabul qilingan.
Izoh (0)