O‘zbekistondagi davlat maktablarida 40 ming nafardan ortiq talaba pedagoglik qilmoqda. Bu haqda Maktabgacha va maktab taʼlimi vazirligi boshqarma boshlig‘i Erkin Murodov “Daryo” muxbiri bilan suhbatda maʼlumot berdi.
Erkin Murodovning aytishicha, mamlakatning olis va chekka hududlarida o‘qituvchiga bo‘lgan ehtiyoj katta.
“Mazkur ehtiyojni yuqori bosqich talabalari hisobiga qoplash imkoniyati bor. Talaba maktabga kelgani amalda ishlab turgan o‘qituvchining o‘rnini egallab oladi, degani emas. U faqat vakant bo‘lgan va o‘qituvchiga ehtiyoj mavjud joylarga ishga qabul qilinadi. Bugun maktablarimizda 525 ming nafar o‘qituvchilar bo‘lsa, shundan 40 mingdan ortig‘i talaba. Buning unchalik yomon tomoni yo‘q. Ular ertaga maktabga moslashib, bo‘lajak o‘qituvchilik kasbini sharafi va mashaqqatini tushunib borsa, faqat yaxshi tomonga bo‘ladi”, dedi mutaxassis.
Erkin Murodovning qo‘shimcha qilishicha, ikki yil ilgari oliy taʼlimda “4+2” tizimi joriy etilgan.
“Talabalarning olti kunlik o‘qish haftasining to‘rt kuni oliy taʼlimda, ikki kuni maktabda o‘tadi. Bunda 2-bosqichdan boshlab talabalar maktab bilan bog‘lanadi. Talaba to‘rt yil o‘qib, dars berishga yana bir yil moslashishga vaqt sarflagandan ko‘ra, 3-4-kurslardayoq maktabga kelib, mahoratini oshirgani yaxshiroq”, dedi vazirlik vakili.
Maʼlum qilinishicha, hozir O‘zbekistonda 10 182 ta davlatga qarashli maktablar faoliyat yuritmoqda. Ularda qariyb 6,4 million nafar bola tahsil olyapti. Shu bilan birga, respublikada 400 tadan ortiq nodavlat maktablar ham ishlamoqda.
Izoh (0)