6 август куни Мактабгача ва мактаб таълими вазирлиги 1-синф ўқувчиларига бериладиган бепул ўқув қуролларини ҳудудларга жўнатишни бошлади. Бу ҳақда ОАВ вакиллари учун ташкил этилган пресс-турда маълум қилинди, дея хабар берди “Дарё” мухбири.
Пресс–тур иштирокчилари дастлаб Тошкент вилояти Тошкент туманидаги вазирликка қарашли корхонада бўлди.
Маълум қилинишича, бу йилги совғалар 12 номдаги ўқув қуроллари — портфел, ёзув ва расм дафтарлари, акварел бўёқлари, рангли қоғоз, қаламдон, ручка, рангли қалам, оддий қалам, пластилин, елим ва ўчирғич тўпламидан иборат.
Мактабгача ва мактаб таълими вазирлиги бошқарма бошлиғи Эркин Муродовнинг айтишича, совғалар 719 366 нафар ўқувчига мўлжалланган.
“Ҳозиргача 586 290 нафар (81,5 фоиз) ўқувчи 1-синфга қабул қилинди. Мактабларга қабул жараёни давом этмоқда. Ўқув қуроллари республикадаги барча давлат ва нодавлат мактабларга етказилади. Бу йил маҳсулотлар сифатига алоҳида эътибор берилди. Аввалги йилларда ўғил ва қиз болалар учун алоҳида рангларда тайёрланган бўлса, янги ўқув қуроллари барча ўқувчиларга бир хил рангда берилади”, деди вазирлик масъули.
“Президент совғаси” давлат бюджети ҳисобидан харид қилинган. Ўқув қуроллари 20 августгача республикадаги барча мактабларга тўлиқ етказилади.
Вазирлик маълумотларига кўра, 2024–2025-ўқув йилида мамлакатдаги жами 10 182 та давлат мактабларида 525 минг нафар ўқитувчи 6,5 миллион нафардан ортиқ ўқувчиларга таълим бериши кутилмоқда. Янги ўқув йилида республикадаги 37 548 та (6867 та давлат, 835 та нодавлат, 1462 та ДХШ ва 28 384 та оилавий) боғчаларида 2,3 миллион нафардан ортиқ 3–7 ёшли болалар қамраб олинади. Бу мактабгача таълим билан қамров даражасининг 74,6 фоизини ташкил этади.
Жорий йилда Ўзбекистонда давлат дастури асосида 608 та мактабда қурилиш–таъмирлаш ишлари амалга оширилиши белгиланган. Хусусан, йил давомида 30 та янги мактаб қурилиши режалаштирилган. Шу билан бирга, 518 та мактаб реконструкция қилиниши, 60 та мактаб мукаммал таъмирланиши кўзда тутилган. Натижада 180 мингдан ортиқ янги ўқувчи ўринлари яратилиши керак.
Пресс–тур давомида ОАВ вакиллари Тошкент шаҳри Чилонзор туманидаги 126-мактаб ва 204-сонли МТТ да бўлди.
“Янги ўқув йилида 175 нафар болани 1-синфга қабул қиламиз. Мактабимиз 1 050 ўқувчи ўрнига мўлжалланган. Янги ўқув йилини 2 200 нафар ўқувчи билан бошлашни режалаштирганмиз. Болалар икки сменада таълим олади. Ҳозир мактабимизга бошланғич синф ўқувчилари учун “Президент совғаси” етиб келди. Энди уларни болажонларга топширамиз”, деди 126-мактаб директори Муяссар Баҳромова.
Тошкент шаҳридаги 204-сонли давлат боғчаси директори Шаҳноза Аҳадованинг айтишича, бу йил 100 нафар тарбияланувчи мактаб ёшига етган.
“Мактабгача таълим ташкилотимиз 840 ўринга мўлжалланган. Жорий йилда мактабгача тайёрлов курсларимизни 100 нафар болалар битирди. Улар энди мактабларга қабул қилинади. Биз яна 100 нафар болани боғчамизга қабул қилиш имкониятига эга бўламиз”, деди боғча мудираси.
Вазирликнинг маълум қилишича, жорий йил якунигача республикада болаларнинг мактабгача таълим билан қамров даражасини 76 фоизга етказиш режа қилинган. Хусусан, 6 ёшли болаларни мактабга тайёрлов тизими билан қамраб олиш кўрсаткичи 96 фоизга етказиш белгиланган.
Изоҳ (0)