“Biz jadidlarning yiqilgan bayrog‘ini tiklayapmiz” — Saida Mirziyoyeva

O‘zbekiston prezidenti yordamchisi Saida Mirziyoyeva Qozog‘istonda bo‘lib o‘tgan “Zakovat” xalqaro musobaqasida millat maʼrifatparvarlari bo‘lgan O‘zbekistondagi jadidlar va Qozog‘istondagi Alash harakati vakillarini eslab o‘tdi, ularning o‘xshash tarixi haqida gapirdi.

“XX asr boshlarida jadidlar ham, Alash harakati vakillari ham yagona maqsad – xalqni ozod qilish va vatan ravnaqiga intilganlar. Barchasining orzusi taraqqiy etgan jamiyat bo‘lgan. Nima uchun mintaqamiz rivojlanishda dunyo mamlakatlaridan ortda qolayotganini o‘lkamiz ziyolilari yaxshi anglagan. Lekin ularga o‘ylagan niyatlarini amalga oshirish imkoni berilmadi”.

Bugun mamlakatlar rahbarlarining siyosiy irodasi tufayli ularning ulug‘ ishlari davom ettirilmoqda. Saida Mirziyoyeva shunday dedi:

“Bir necha avlod almashdi. Mana endi, davlatimiz rahbarining siyosiy irodasi sabab bo‘lib, jadidlarning yiqilgan bayrog‘ini tiklamoqdamiz. Xuddi bizdagi kabi Alash harakati taraqqiyparvar yoshlar uchun namuna hisoblanadi. Biz ularning g‘oyalarini amalga oshirish, maʼrifat va taʼlimni ular orzu qilgan darajaga yetkazish harakatini boshladik”.

Saida Mirziyoyeva, shuningdek, “Zakovat” klubining O‘zbekiston va Qozog‘iston o‘rtasidagi intellektual rivojlanish va madaniy almashinuv ramzi sifatidagi ahamiyatini taʼkidladi:

“Aynan shuning uchun bugun sizlarni – ‘Zakovat’ klubining qozog‘istonlik va o‘zbekistonlik ishtirokchilarini qutlamoqdamiz. Keling, bir-birimizni olqishlaylik!”