Surxondaryo viloyatida elektr hisoblagichga tashqi ta’sir ko‘rsatgan fermer xo‘jaligi aniqlandi. Bu haqda “O‘zenergoinspeksiya” matbuot xizmati xabar berdi.
Qayd etilishicha, “O‘zenergoinspeksiya” Surxondaryo viloyati hududiy boshqarmasi tomonidan huquqni muhofaza qiluvchi organlar bilan hamkorlikda nazorat tadbiri o‘tkazilgan. Tadbirda Termiz tumanida joylashgan “A.D.” fermer xo‘jaligi elektr hisoblagichga tashqi ta’sir ko‘rsatib, elektr energiyasidan noqonuniy foydalangani aniqlangan.
Ushbu qoidabuzarliklar natijasida davlat manfaatlariga 1,5 milliard so‘mlik zarar yetkazilgani ma’lum bo‘lgan.
Mazkur holat yuzasidan tegishli hujjatlar rasmiylashtirilib, huquqni muhofaza qiluvchi organlarga yuborilgan.
Avvalroq Sirdaryoda 491 mln so‘mlik “svet”dan noqonuniy foydalangan fermer xo‘jaligi rahbari ushlangani to‘g‘risida xabar berilgandi. Shuningdek, Buxoroda 433,5 mln so‘mlik elektr energiyasidan noqonuniy foydalangan MCHJ aniqlangan, Qoraqalpog‘istonda 180 mln so‘mlik elektrdan noqonuniy foydalanganlar ushlangan edi.
Izoh (0)