Qashqadaryo viloyatida suv nasoslarini elektr tarmog‘iga yashirincha ulab, elektr energiyasidan noqonuniy foydalangan fermer xo‘jaligi aniqlandi, deb xabar beradi “O‘zenergoinspeksiya” matbuot xizmati.
Qayd etilishicha, “O‘zenergoinspeksiya” Qashqadaryo viloyati hududiy boshqarmasi tomonidan nazorat tadbiri o‘tkazilgan. Tadbirda Koson tumanida joylashgan “B.I.” fermer xo‘jaliklariga tegishli bo‘lgan dala maydonlariga o‘rnatilgan ikkita suv nasosini o‘zboshimchalik bilan tarmoqqa to‘g‘ridan to‘g‘ri ulab, elektr energiyasidan noqonuniy foydalanilgan aniqlandi.
Dastlabki hisob-kitoblarga ko‘ra, davlat manfaatlariga yetkazilgan zarar miqdori 664,6 million so‘mni tashkil etgan.
Mazkur holatlar yuzasidan tegishli hujjatlar rasmiylashtirilib, huquqni muhofaza qiluvchi organlarga yuborilgan.
Avvalroq Toshkent viloyati Bo‘stonliq tumanida ikki nafar fuqaro 917,2 million so‘mlik elektr energiyasidan noqonuniy foydalangani to‘g‘risida xabar berilgandi. O‘zbekistonda 2024-yilning birinchi yarmida 550 milliard so‘mdan ortiq elektr energiyasi va tabiiy gazdan noqonuniy foydalanish holati aniqlangan.
Izoh (0)