Qozog‘iston milliy sog‘liqni saqlash tadqiqot markazi G‘arbiy Nil virusining paydo bo‘lishi va tarqalishining haqiqiy xavfi haqida mamlakat aholisini ogohlantirdi.
“G‘arbiy Nil virusining asosiy tashuvchilari Kulex chivinlari bo‘lib, ular odatda turg‘un suvda ko‘payadi. Kulex chivinlari mavjudligini inobatga olsak, Qozog‘istonda G‘arbiy Nil virusining paydo bo‘lishi va tarqalishining haqiqiy xavfi mavjud”, deyiladi ilmiy markaz xabarida.
G‘arbiy Nil virusi chivin orqali yuquvchi virus bo‘lib, odamlar, qushlar, otlar va boshqa ba’zi sutemizuvchilarda kasallikka olib kelishi mumkin. CDC ma’lumotlariga ko‘ra, AQSHda yuzlab holatlar qayd etilgan bo‘lib, ularning eng yuqori cho‘qqisi yoz va kuz oylarida kuzatiladi. Yevropada, ayniqsa, janubiy mamlakatlarda, epidemiyalar ham kuzatilmoqda. Rossiyada G‘arbiy Nil isitmasi bilan kasallanish holatlari so‘nggi paytlarda tez-tez uchramoqda.
Shifokorlar simptomlarni quyidagicha ta’riflashadi:
Kasallikning yengil shaklida: isitma, bosh og‘rig‘i, mushak va bo‘g‘imlarda og‘riq, toshma va qayt qilish.
Og‘ir holatida: meningit yoki ensefalit, zaiflik, hushni yo‘qotish yoki koma kabi nevrologik asoratlar.
Xavf guruhlari: 60 yoshdan oshgan, shuningdek, immuniteti zaif odamlar.
Shifokorlar quyidagi profilaktika choralarini tavsiya qiladi:
- teri va kiyimda DEET, pikaridin yoki limonli evkalipt yog‘ini o‘z ichiga olgan insektitsidlar va repellentlardan foydalanish;
- o‘rmonli hududlarga va suv havzalariga borganda, yopiq himoya kiyimlarini kiyish.
- turg‘un suvli hududlarda bo‘lishdan saqlanish;
- chivinlarning xonaga kirishiga yo‘l qo‘ymaslik uchun deraza va eshiklarga maxsus setkalar o‘rnatish.
Shifokorlar, shuningdek, kasallikning dastlabki belgilarida, masalan, isitma, bosh og‘rig‘i, charchoq va mushak og‘rig‘i paydo bo‘lganda shifokorga murojaat qilish zarurligini ta’kidlagan.
Izoh (0)