Қозоғистон миллий соғлиқни сақлаш тадқиқот маркази Ғарбий Нил вирусининг пайдо бўлиши ва тарқалишининг ҳақиқий хавфи ҳақида мамлакат аҳолисини огоҳлантирди.
“Ғарбий Нил вирусининг асосий ташувчилари Кулех чивинлари бўлиб, улар одатда турғун сувда кўпаяди. Кулех чивинлари мавжудлигини инобатга олсак, Қозоғистонда Ғарбий Нил вирусининг пайдо бўлиши ва тарқалишининг ҳақиқий хавфи мавжуд”, дейилади илмий марказ хабарида.
Ғарбий Нил вируси чивин орқали юқувчи вирус бўлиб, одамлар, қушлар, отлар ва бошқа баъзи сутемизувчиларда касалликка олиб келиши мумкин. CDC маълумотларига кўра, АҚШда юзлаб ҳолатлар қайд этилган бўлиб, уларнинг энг юқори чўққиси ёз ва куз ойларида кузатилади. Европада, айниқса, жанубий мамлакатларда, эпидемиялар ҳам кузатилмоқда. Россияда Ғарбий Нил иситмаси билан касалланиш ҳолатлари сўнгги пайтларда тез-тез учрамоқда.
Шифокорлар симптомларни қуйидагича таърифлашади:
Касалликнинг енгил шаклида: иситма, бош оғриғи, мушак ва бўғимларда оғриқ, тошма ва қайт қилиш.
Оғир ҳолатида: менингит ёки энсефалит, заифлик, ҳушни йўқотиш ёки кома каби неврологик асоратлар.
Хавф гуруҳлари: 60 ёшдан ошган, шунингдек, иммунитети заиф одамлар.
Шифокорлар қуйидаги профилактика чораларини тавсия қилади:
- тери ва кийимда ДЕЕТ, пикаридин ёки лимонли эвкалипт ёғини ўз ичига олган инсектицидлар ва репеллентлардан фойдаланиш;
- ўрмонли ҳудудларга ва сув ҳавзаларига борганда, ёпиқ ҳимоя кийимларини кийиш.
- турғун сувли ҳудудларда бўлишдан сақланиш;
- чивинларнинг хонага киришига йўл қўймаслик учун дераза ва эшикларга махсус сеткалар ўрнатиш.
Шифокорлар, шунингдек, касалликнинг дастлабки белгиларида, масалан, иситма, бош оғриғи, чарчоқ ва мушак оғриғи пайдо бўлганда шифокорга мурожаат қилиш зарурлигини таъкидлаган.
Изоҳ (0)