Oliy Majlis Senati raisi Tanzila Norboyeva BMT Aholishunoslik jamg‘armasining (UNFPA) O‘zbekistondagi vakolatxonasi rahbari Nigina Abaszade bilan uchrashuv o‘tkazdi. Bu haqda parlament yuqori palatasi matbuot xizmati xabar berdi.
Qayd etilishicha, uchrashuvda O‘zbekiston va UNFPA hamkorligining bugungi holati va istiqbollari, jumladan, jamg‘arma ko‘magida mamlakatda amalga oshirilayotgan loyiha va tadbirlar bilan bog‘liq masalalar ko‘rib chiqilgan.
Muloqot davomida O‘zbekiston hududlarining ijtimoiy-iqtisodiy rivojlantirish rejalarini ishlab chiqishda bugungi demografik jarayonlarni hisobga olish, 2025–2026-yillarda aholini ro‘yxatga olish bo‘yicha hamkorlik qilish masalalari muhokama qilingan.
Bundan tashqari, zamonaviy texnologiyalarni qo‘llash asosida aholi sog‘lig‘ini saqlash, reproduktiv salomatlikni yaxshilash va kadrlar salohiyatini oshirishga qaratilgan loyihalar samaradorligiga erishish yuzasidan aniq takliflar ilgari surilgan.
Shu bilan birga, respublikada zo‘ravonlikka qarshi kurashish bo‘yicha qabul qilingan qonunlarni hayotga tatbiq qilishda ilg‘or tajribalardan samarali foydalanish masalasida fikr almashilgan, bu borada hamkorlikda alohida chora-tadbirlar ishlab chiqilishi belgilab olingan.
Prezidentning 2019-yil 5-fevraldagi farmoniga muvofiq, respublikada aholini ro‘yxatga olish tadbirini 2022-yilda o‘tkazish belgilangan edi. 2020-yil 16-martda “Aholini ro‘yxatga olish to‘g‘risida”gi qonun qabul qilindi. 2020-yilda boshlangan koronavirus pandemiyasi sababli ushbu tadbirni o‘tkazish 2023-yilga ko‘chirilgandi. Ammo 2023-yilda ham O‘zbekistonda aholini ro‘yxatga olish yana kechiktirildi.
Shavkat Mirziyoyev O‘zbekistonda mustaqillik yillarida mamlakatda aholini ro‘yxatga olish o‘tkazilmaganini aytgandi.
Izoh (0)