Isroil aviatsiyasi 30-iyul kuni Suriya janubidagi ikkita havo bazasiga zarba bergan. Bu haqda Al Arabiya nashri xabar berdi.
Manbada aytilishicha, hujum Damashqdan janubi-sharqda joylashgan harbiy nishonlarga qaratilgan. Qiruvchi samolyotlar havo bazasi va unga tutash hududlarda seriyali havo hujumlari amalga oshirgan.
Rasmiylar so‘nggi hujum hozirda Isroil nazoratida bo‘lgan Golan tepaliklariga zarba berilishiga javoban tashkil etilganini maʼlum qilishgan. Ayni damda Isroil shimoli-sharqi bo‘ylab ikki mamlakat chegarasida keskinlik kuchaygan, harbiy qismlar shay holatga keltirilgan.
Yaqin Sharqdagi ko‘plab manbalar hujum oqibatida qurbonlar bo‘lmaganini bildirgan. Isroil nishoniga aylangan Dara provinsiyasidagi inshootlarga yetkazilgan zarar ko‘lami esa hisoblab chiqilayotgani bildirilgan.
Isroil mudofaa kuchlari hujumni tasdiqlagan. Suriya hukumati esa harbiy inshootlarga zarar yetgani haqida hech qanday rasmiy maʼlumot taqdim etmagan.
Maʼlumot o‘rnida, 27-iyul kuni Golanning Isroil nazoratidagi qismiga havo hujumi uyushtirilgan edi. Oqibatda 12 yoshli bola hujumda halok bo‘lgan. Isroil Bosh vaziri Binyamin Netanyaxu hujum sodir bo‘lgan hududga borgan va mahalliy vakillar bilan uchrashuvda teraktga javob qaytarilishini bildirgan.
Izoh (0)