Исроил авиацияси 30 июль куни Сурия жанубидаги иккита ҳаво базасига зарба берган. Бу ҳақда Al Arabiya нашри хабар берди.
Манбада айтилишича, ҳужум Дамашқдан жануби-шарқда жойлашган ҳарбий нишонларга қаратилган. Қирувчи самолётлар ҳаво базаси ва унга туташ ҳудудларда серияли ҳаво ҳужумлари амалга оширган.
Расмийлар сўнгги ҳужум ҳозирда Исроил назоратида бўлган Голан тепаликларига зарба берилишига жавобан ташкил этилганини маълум қилишган. Айни дамда Исроил шимоли-шарқи бўйлаб икки мамлакат чегарасида кескинлик кучайган, ҳарбий қисмлар шай ҳолатга келтирилган.
Яқин Шарқдаги кўплаб манбалар ҳужум оқибатида қурбонлар бўлмаганини билдирган. Исроил нишонига айланган Дара провинциясидаги иншоотларга етказилган зарар кўлами эса ҳисоблаб чиқилаётгани билдирилган.
Исроил мудофаа кучлари ҳужумни тасдиқлаган. Сурия ҳукумати эса ҳарбий иншоотларга зарар етгани ҳақида ҳеч қандай расмий маълумот тақдим этмаган.
Маълумот ўрнида, 27 июль куни Голаннинг Исроил назоратидаги қисмига ҳаво ҳужуми уюштирилган эди. Оқибатда 12 ёшли бола ҳужумда ҳалок бўлган. Исроил Бош вазири Биньямин Нетаньяху ҳужум содир бўлган ҳудудга борган ва маҳаллий вакиллар билан учрашувда терактга жавоб қайтарилишини билдирган.
Изоҳ (0)