AQSH harbiylari “Islomiy davlat” (ISHID) bosh yetakchisi Abdulqodir Mo‘minga havodan hujum qildi. Biroq uning o‘limini hozircha tasdiqlash imkoni yo‘q. Bu haqda NBC xabar berdi.
AQSH rasman Mo‘minni Somalidagi terroristik guruh rahbari deb ataydi. Biroq ismini sir saqlagan ikki amaldor u 2023-yilda butun tashkilotni boshqarganini maʼlum qildi. Vashington uni Somalidagi qotilliklar, jumladan, 2019-yilda sudyaning o‘ldirilishi va 2016-yilda Puntlend provinsiyasidagi shaharchaning bir necha oy davomida bosib olinishi uchun javobgar deb hisoblaydi.
Mo‘min 2022-yil oxirida Suriyadagi janglarda halok bo‘lgan terrorchilar yetakchisi Abu al-Hasan al-Hoshimiy al-Qurashiy o‘rnini egallagandi. Ikkinchisi may oyining oxirida Somalida nishonga olingan.
AQSHning Afrikadagi qo‘mondonligi (AFRICOM) 31-may kuni ISHID jangarilariga qarshi havo hujumi natijasida uch nafar terrorchi halok bo‘lgani, biroq tinch aholi vakillari orasida qurbonlar yo‘qligi haqida xabar bergan. Biroq bayonotda hujumda kim nishonga olingani va halok bo‘lgan jangarilarning shaxsiga aniqlik kiritilmagan.
ISHIDning Somalidagi faoliyati
Somalidagi ISHID yacheykasi nisbatan kichik bo‘lib, 100 dan 200 gacha jangarini o‘z ichiga olida, ularning barchasi mamlakat shimolida joylashgan. Terrorchilarning yana boshqa kichik guruhlari Liviya, Kongo, Mozambik va Afrikaning boshqa qismlarida mavjud. AQSH razvedka idoralariga ko‘ra, ISHIDning minglab jangarilari hamon Iroq shimoli va Suriya shimoli-sharqida faoliyat yuritadi.
Izoh (0)