“Tadbirkorlikni rivojlantirish kompaniyasi” 2024-yil yil yakuniga qadar taqdim etiladigan yordamlar prognozi haqida ma’lumot berdi.
Unga ko‘ra, tadbirkorlarning 2,1 mingta loyihalarini amalga oshirish uchun 1,4 trillion so‘m miqdorida qo‘llab-quvvatlanishi prognoz qilinmoqda. Bunda 556 milliard so‘m kafillik, 300 milliard so‘m xizmatlar ipotekasi, 300 milliard so‘m kredit resursi, 115 milliard so‘m kompensatsiya yordamlari taqdim etiladi hamda loyihalarda 84 milliard so‘m miqdorida ulushdor bo‘lib ishtirok etiladi.
Tadbirkor 10 milliard so‘m miqdorida 18 foiz ustama haq yoki bo‘lib to‘lash shartlari asosida xizmatlar ipotekasi yordamidan foydalanganda 7 yil davomida bozor sharoitida ajratilgan qarzlardan farqli ravishda o‘rtacha 3 milliard so‘mdan xarajatni iqtisod qiladi.
Xuddi shuningdek, tadbirkor 7 yillik 3 milliard so‘m miqdoridagi kapitalga ulush kiritish yordamidan foydalanganda 3,3 milliard so‘m foiz xarajati iqtisod bo‘ladi va bu mablag‘lar tadbirkor ixtiyorida qoladi.
Yordamlarning taqdim etilishi ortidan kutilayotgan natija:
- jami 2,2 trln so‘m miqdoridagi kreditlar kafillik va kompensatsiyalash asosida qo‘llab-quvvatlanadi;
- aylanma mablag‘lari uchun 275 mlrd so‘m mablag‘ tadbirkorlarning o‘z ixtiyorida qoldiriladi;
- kreditlarning 40 foizi garov taʼminoti bilan taʼminlanadi;
- yashil loyiha, xususan, yashil va energiya tejamkor loyihalarni qo‘llab-quvvatlash uchun 168 mlrd so‘m yo‘naltirildi;
- 1,2 mingdan ortiq tadbirkorlarning faoliyatidagi turli masalalar bo‘yicha maslahatlar beriladi;
- loyihalar ishga tushishi hisobiga 8 mingdan ortiq yangi ish o‘rinlari yaratilishi rejalashtirilgan.
O‘tgan 6 yil davomida tadbirkorlarning 47 mingdan ortiq loyihalariga 17,1 trillion so‘m miqdorida kompaniya yordamlari taqdim etildi. Kompaniya tomonidan taqdim etilgan yordamlar qishloq xo‘jaligi loyihalariga 9,1 trillion so‘m (53 foiz), sanoat loyihalariga 4,4 trillion so‘m (26 foiz) hamda xizmat ko‘rsatish loyihalariga 3,6 trillion so‘m (21 foiz) to‘g‘ri keladi.
Ushbu yordamlardan Xorazm (12 foiz), Toshkent (10 foiz), Buxoro (9 foiz) viloyatlari hamda Toshkent shahrida (9 foiz) ro‘yxatga olingan tadbirkorlar qolgan hududlardagi tadbirkorlarga nisbatan ko‘proq foydalanilgan.
“Tadbirkorlikni rivojlantirish kompaniyasi” haqida
Tadbirkorlik faoliyatini qo‘llab-quvvatlash davlat jamg‘armasi prezident farmoni bilan 2023-yilda “Tadbirkorlikni rivojlantirish kompaniyasi” sifatida qayta tashkil etilgandi. Natijada kompaniya tomonidan biznesni qo‘llab-quvvatlash bo‘yicha yangi instrumentlar joriy etilmoqda va amaldagi yordam turlari kengaytirilmoqda.
Farmon qabul qilingungacha kafillik faqat kichik tadbirkorlarga berilardi. Hozirda o‘rta biznes ham bunday kafillik olishi mumkin. Ilgari kafillik faqat milliy valyutadagi kreditlarga berilgan bo‘lsa, endilikda tadbirkorlar xorijiy valyutadagi kreditlari uchun ham kafillik olishi mumkin.
Izoh (0)