O‘zbekiston aholisining umumiy daromadlari oshgani maʼlum qilindi

O‘zbekiston aholisining yarim yillik daromadlari real o‘sishi 8,6 foizga yetib, jon boshiga 10,8 million so‘mdan to‘g‘ri keldi. Bu haqda Statistika agentligi maʼlumot berdi.

Joriy yil yanvar—iyun oylarida mamlakat aholining umumiy daromadlari 399,2 trillion so‘mni tashkil etdi. Bu ko‘rsatkich 2023-yil mos davrida 338,4 trillion so‘m bo‘lgan.

Yarim yil mobaynida aholi umumiy daromadlarining nominal nominal o‘sishi 18,4 foizga, real o‘sish surʼati 8,6 foizga yetdi. Hisobot davrida aholi jon boshiga umumiy daromadlar 10,8 million so‘mdan to‘g‘ri keldi.

Taqqoslash uchun, o‘tgan yilning birinchi yarmida aholi daromadlarining real o‘sishi 6,5 foiz bo‘lib, jon boshiga daromadlar 9,3 million so‘mni tashkil etgan.

Joriy yil birinchi yarmida aholi jon boshiga umumiy daromadlar hajmida Toshkent shahri (28,7 million so‘m) yetakchilik qilgan. Shu bilan birga, Navoiy (16,6 million so‘m), Buxoro (11,8 million so‘m), Toshkent (10,8 million so‘m) viloyatlarida o‘rtacha respublika darajasidan yuqori ko‘rsatkichlar qayd etilgan.

Aholi jon boshiga umumiy daromadlar hajmining eng quyi ko‘rsatkichlari Qoraqalpog‘istonda (7,2 million so‘m), Namangan (7,4 million so‘m) va Surxondaryo (8 million so‘m) viloyatlarida kuzatilgan.

Aholi umumiy daromadlari tarkibining 29,9 foizi yollanma ishchilar daromadlariga to‘g‘ri keldi. Qolgan 30,7 foiz ulush mustaqil ravishda band bo‘lishdan, 27,8 foizi transfertlardan olingan daromadlardan kelgan.

Hududlar bo‘yicha aholi umumiy daromadlari tarkibida mehnat faoliyatidan olingan daromadlarning eng yuqori ulushi Navoiy (76,3 foiz), Toshkent (73,7 foiz), Jizzax (71,4 foiz) viloyatlarida kuzatildi. Aksincha, Samarqand, vodiy viloyatlari va Toshkent shahri o‘rtacha respublika darajasidan past ko‘rsatkichni tashkil etdi.

Olti oy davomida mamlakat aholisi mol-mulkdan 14,3 trillion so‘m daromad olgan. Bu umumiy daromadlar tarkibining 3,6 foiziga teng.

Yarim yil mobaynida transfertlardan olingan daromadlarning 37,1 foizini ijtimoiy transfertlardan tushumlar tashkil qilgan. Ijtimoiy transfertlar tarkibida pensiyalar eng ko‘p ulush — 79,1 foizni, nafaqalar 19 foizni, stipendiyalar 1,9 foizni tashkil etdi.