“Tadbirkorlikni rivojlantirish kompaniyasi” 2024-yilda tijorat banklari orqali tadbirkorlik subyektlariga taqdim etadigan kafillik va kompensatsiya yordamlari miqdorlari haqida “Daryo”ga ma’lumot berdi.
Unga ko‘ra, joriy yilda tadbirkorlarga beriladigan kafillik yordamining eng kam miqdori — 480 milliard so‘mni tashkil etadi.
Ushbu mablag‘larning asosiy qismi davlatga qarashli banklar, ya’ni Biznesni rivojlantirish banki — 61 milliard so‘m, Xalq banki — 57 milliard so‘m, Mikrokreditbank — 55 milliard so‘m, Agrobank va SQB — 53 milliard so‘mdan, Turonbank — 50 milliard so‘m orqali tadbirkorlarga yo‘naltiriladi.
Kafillik berilishi rejalashtirilgan banklarning orasida Ipak Yo‘li, Kapitalbank va Garant Bank eng quyi o‘rinlarni egallab turibdi — har birida 2 milliard so‘mdan sal ko‘proq.
Faqat kichik tadbirkorlik subyektlariga beriladigan kompensatsiya yordamining eng ko‘p miqdori esa — 150 milliard so‘mdan iborat.
Kompensatsiya yordamini ko‘rsatishda ko‘maklashuvchi banklar orasida ham Biznesni rivojlantirish banki birinchilikni egallab turibdi — 19 milliard so‘m. Xalq banki orqali — 18 milliard so‘m, Mikrokreditbank, Agrobank va SQB orqali — 17 milliard so‘mdan, Turonbank orqali — 15 milliard so‘mdan yo‘naltiriladi.
Eng kam yordamni tadbirkorlarga yetkazishda vositachilik qiladigan banklar Ipak Yo‘li, Kapitalbank va Garant Bank hisoblanadi — har biriga 1 milliard so‘mdan kamroq mablag‘ ajratilishi reja qilingan.
Buning natijasida 2024-yilda kafillik yordami bilan tadbirkorlarning 2 trillion so‘mdan ortiq, kompensatsiya ko‘magi bilan esa qariyb 3,5 trillion so‘mlik kreditlari qo‘llab-quvvatlanadi.
Tadbirkorlik faoliyatini qo‘llab-quvvatlash davlat jamg‘armasi prezident farmoni bilan 2023-yilda “Tadbirkorlikni rivojlantirish kompaniyasi” sifatida qayta tashkil etilgandi. Natijada kompaniya tomonidan biznesni qo‘llab-quvvatlash bo‘yicha yangi instrumentlar joriy etilmoqda va amaldagi yordam turlari kengaytirilmoqda.
Farmon qabul qilingungacha kafillik faqat kichik tadbirkorlarga berilardi. Hozirda o‘rta biznes ham bunday kafillik olishi mumkin. Ilgari kafillik faqat milliy valyutadagi kreditlarga berilgan bo‘lsa, endilik tadbirkorlar xorijiy valyutadagi kreditlari uchun ham kafillik olishi mumkin.
Izoh (0)