“Тадбиркорликни ривожлантириш компанияси” 2024 йил йил якунига қадар тақдим этиладиган ёрдамлар прогнози ҳақида маълумот берди.
Унга кўра, тадбиркорларнинг 2,1 мингта лойиҳаларини амалга ошириш учун 1,4 триллион сўм миқдорида қўллаб-қувватланиши прогноз қилинмоқда. Бунда 556 миллиард сўм кафиллик, 300 миллиард сўм хизматлар ипотекаси, 300 миллиард сўм кредит ресурси, 115 миллиард сўм компенсация ёрдамлари тақдим этилади ҳамда лойиҳаларда 84 миллиард сўм миқдорида улушдор бўлиб иштирок этилади.
Тадбиркор 10 миллиард сўм миқдорида 18 фоиз устама ҳақ ёки бўлиб тўлаш шартлари асосида хизматлар ипотекаси ёрдамидан фойдаланганда 7 йил давомида бозор шароитида ажратилган қарзлардан фарқли равишда ўртача 3 миллиард сўмдан харажатни иқтисод қилади.
Худди шунингдек, тадбиркор 7 йиллик 3 миллиард сўм миқдоридаги капиталга улуш киритиш ёрдамидан фойдаланганда 3,3 миллиард сўм фоиз харажати иқтисод бўлади ва бу маблағлар тадбиркор ихтиёрида қолади.
Ёрдамларнинг тақдим этилиши ортидан кутилаётган натижа:
- жами 2,2 трлн сўм миқдоридаги кредитлар кафиллик ва компенсациялаш асосида қўллаб-қувватланади;
- айланма маблағлари учун 275 млрд сўм маблағ тадбиркорларнинг ўз ихтиёрида қолдирилади;
- кредитларнинг 40 фоизи гаров таъминоти билан таъминланади;
- яшил лойиҳа, хусусан, яшил ва энергия тежамкор лойиҳаларни қўллаб-қувватлаш учун 168 млрд сўм йўналтирилди;
- 1,2 мингдан ортиқ тадбиркорларнинг фаолиятидаги турли масалалар бўйича маслаҳатлар берилади;
- лойиҳалар ишга тушиши ҳисобига 8 мингдан ортиқ янги иш ўринлари яратилиши режалаштирилган.
Ўтган 6 йил давомида тадбиркорларнинг 47 мингдан ортиқ лойиҳаларига 17,1 триллион сўм миқдорида компания ёрдамлари тақдим этилди. Компания томонидан тақдим этилган ёрдамлар қишлоқ хўжалиги лойиҳаларига 9,1 триллион сўм (53 фоиз), саноат лойиҳаларига 4,4 триллион сўм (26 фоиз) ҳамда хизмат кўрсатиш лойиҳаларига 3,6 триллион сўм (21 фоиз) тўғри келади.
Ушбу ёрдамлардан Хоразм (12 фоиз), Тошкент (10 фоиз), Бухоро (9 фоиз) вилоятлари ҳамда Тошкент шаҳрида (9 фоиз) рўйхатга олинган тадбиркорлар қолган ҳудудлардаги тадбиркорларга нисбатан кўпроқ фойдаланилган.
“Тадбиркорликни ривожлантириш компанияси” ҳақида
Тадбиркорлик фаолиятини қўллаб-қувватлаш давлат жамғармаси президент фармони билан 2023 йилда “Тадбиркорликни ривожлантириш компанияси” сифатида қайта ташкил этилганди. Натижада компания томонидан бизнесни қўллаб-қувватлаш бўйича янги инструментлар жорий этилмоқда ва амалдаги ёрдам турлари кенгайтирилмоқда.
Фармон қабул қилингунгача кафиллик фақат кичик тадбиркорларга бериларди. Ҳозирда ўрта бизнес ҳам бундай кафиллик олиши мумкин. Илгари кафиллик фақат миллий валютадаги кредитларга берилган бўлса, эндиликда тадбиркорлар хорижий валютадаги кредитлари учун ҳам кафиллик олиши мумкин.
Изоҳ (0)