Tadbirkorlikni qo‘llab-quvvatlash davlat jamg‘armasi Tadbirkorlikni rivojlantirish kompaniyasi aksiyadorlik jamiyati (kompaniya) sifatida qayta tashkil etilmoqda. Bu haqda prezidentning “Kichik va o‘rta biznesni moliyaviy qo‘llab-quvvatlash tizimini takomillashtirish chora-tadbirlari to‘g‘risida”gi farmonida maʼlum qilindi.
Farmonda loyihalarni moliyalashtirish uchun Tadbirkorlikni qo‘llab-quvvatlash davlat jamg‘armasining amaldagi tashkiliy-huquqiy shakli to‘g‘ridan to‘g‘ri investitsiya jalb etish imkoniyatini bermaydi hamda faoliyati biznesga yo‘naltirilmagan. Shu bois jamg‘arma budjet mablag‘lariga bog‘liq bo‘lib qolmoqda. Bugungi kunga qadar budjetdan 2,7 trillion so‘m ajratilgan va bu daromadlar tarkibida 73 foizni tashkil etadi.
Loyihalarini moliyalashtirishning yangi va muqobil instrumentlarini yaratishga ehtiyojni hisobga olgan holda Tadbirkorlikni qo‘llab-quvvatlash davlat jamg‘armasi Tadbirkorlikni rivojlantirish kompaniyasi aksiyadorlik jamiyati (kompaniya) sifatida qayta tashkil etilmoqda.
Kompaniyaning resurs bazasini kengaytirish maqsadida 2023—2024-yillarda kompaniya ustav kapitali 300 milliard so‘m miqdorida shakllantiriladi. Shuningdek, 2024—2025-yillarda xalqaro moliya institutlaridan 100 million dollar jalb etiladi.
Xususiy investorlarga kompaniyaning ustav kapitalida ishtirok etish va kompaniyaga xalqaro moliya institutlaridan mustaqil ravishda mablag‘lar jalb etish huquqi berilmoqda.
Xalqaro agentliklarning kredit reytinggi olinishini taʼminlash orqali 2026-yildan boshlab kompaniyaning aksiya va obligatsiyalari kapital bozorlarida joylashtiriladi.
Kompaniya daromadlarini 50 foizga oshirish orqali 2027-yil yakuniga qadar o‘zini o‘zi moliyalashtirishga o‘tkaziladi. Bunda, Markaziy bank kompaniyaning faoliyatini nazorat qilish va tartibga solish sohasida vakolatli davlat organi etib belgilanmoqda.
Shuningdek, to‘g‘ridan to‘g‘ri shartnomalar tuzish orqali xalqaro va xorijiy ekspertlarni jalb etish hamda IT qurilmalari va xizmatlarni sotib olish huquqi berilmoqda.
Kompaniyaning faoliyatini tashkil etish va tadbirkorlarni uzluksiz qo‘llab-quvvatlab borish uchun 2023–2024-yillarda Davlat budjetidan 1,5 trillion so‘m va xalqaro moliya institutlaridan 100 million dollar yo‘naltiriladi.
Izoh (0)