AQSH prezidentligiga Demokratlar partiyasidan nomzod Kamala Harrisning saylovoldi fondiga bir haftada 200 million dollardan ortiq mablag‘ kelib tushdi. Bu haqda AP News manbasi xabar berdi.
Harris prezidentlikka o‘z nomzodini qo‘yganidan beri yig‘ilgan xayriya mablag‘lari qiymati chorak milliard dollarga yaqinlashgan. Rasmiylar kelgusi haftalardagi xayriya kampaniyasi yanada ko‘proq mablag‘ jalb qilishi mumkinligini bildirgan.
Harris fondi saylovoldi kampaniyalarini tashkil etish uchun yig‘ilgan mablag‘lar hisobidan shtatlarda ko‘ngillilar guruhlarini tashkil etgan. Hozirda butun mamlakatda 170 mingdan ortiq shaxslar Demokratlar nomzodi uchun saylovoldi targ‘ibot tadbirlarini amalga oshirishda yordam berish uchun ro‘yxatdan o‘tgan.
Yakshanba kuni yig‘ilgan mablag‘lar borasida o‘zining so‘nggi hisobotini eʼlon qilgan Harris fondi xayriya o‘tkazmalarining 66 foizi yangi homiylardan kelganini bildirgan. Unga ko‘ra, Baydenning poygadan chiqishi va o‘rniga Harris tayinlanishi ortidan homiylarda Demokratlar dasturiga nisbatan ishonch kuchayib ketgan. Bu esa Bayden uchun samarasiz ishlagan xayriya kampaniyasini faollashtirib yuborgan.
“Vitse-prezident Harris poygasida jadallik va energiya kuchaymoqda. Aslida ham bu ikki omil prezidentlik poygasi asosini tashkil qiladi. Saylovlar juda qizg‘in bo‘ladigan ko‘rinadi”, degan Harris saylovoldi kampaniyasining aloqa bo‘yicha direktori Mayk Tayler.
Kamala Harrisning saylovoldi shtabi so‘nggi haftada AQSH bo‘ylab 2300 ga yaqin targ‘ibot tadbirlari tashkil etgan. Harrisning poygasi Trampga nisbatan kech boshlangani sabab Demokratlar ko‘proq targ‘ibotga urg‘u bermoqda.
Izoh (0)