АҚШ ҳукумати Шарқий Осийида кескинлик кучайиши ортидан Японияга янги ҳарбий қисмлар жойлаштиради. Бу ҳақда АҚШ Марказий қўмондонлиги баёнотига асосланиб, CNN нашри хабар берди.
Манбада айтилишича, Вашингтон ва Токио ҳукуматлари 28 июль куни янги ҳарбий келишувга эришган. Ушбу келишув доирасида Японияда жойлаштирилган Ғарб коалицияси қўшинлари янги бўлинмалар билан тўлдирилади ва мудофаа йўлидаги ҳамкорлик кучайтирилади.
АҚШ мудофаа вазири Ллойд Остин, давлат котиби Энтони Блинкен ва уларнинг япониялик ҳамкасблари Минору Кихара ҳамда Ёко Камикава Токиодаги учрашувдан сўнг қўшма баёнотда ўз режаларини эълон қилишган. Ушбу режаларда Хитойнинг “сиёсий, иқтисодий ва ҳарбий тазйиқи” Осиё-Тинч океани минтақасида ва ундан ташқарида энг катта стратегик муаммо эканлиги таъкидланган.
Янги режага кўра, Япониядаги АҚШ кучлари “тинчлик даврида ва фавқулодда вазиятларда, қўшма икки томонлама операциялар доирасида чуқурроқ ўзаро ҳамкорлик ўрнатиш ва биргаликда қадам ташлаш” учун АҚШ Ҳинд-Тинч океани қўмондонлиги раҳбарига бўйсунадиган қўшма кучлар штаб-квартираси сифатида қайта ташкил этилади.
Учрашувдан сўнг ўтказилган матбуот анжуманида АҚШ мудофаа вазири Ллойд Остин икки мамлакатнинг альянс қўмондонлиги ва назоратини “модернизация қилиш” ҳаракатини “тарихий қарор” сифатида олқишлаган. Бу қарор иттифоқнинг сифат даражасини кўтариши маълум қилинган.
“Бу АҚШ кучларининг Япония ташкил этилганидан бери энг муҳим таркиб ўзгариши ва Япония билан ҳарбий алоқаларимиз ўрнатилган 70 йил давомидаги энг катта яхшиланишлардан бири бўлади”, деган Остин.
Ллойд Остин Япония ва АҚШ таҳдидли хатти-ҳаракатларни тўхтатиш ва уларга жавоб бериш бўйича биргаликда ишлаш қобилиятларини кучайтираётганини айтган. Икки мамлакатнинг денгиздаги манёврлари эндиликда Ҳинд-Тинч океани ва ундан ташқаридаги манзилларга ҳам қаратилиши билдирилган.
Янги келишувда кўзда тутилган ҳарбий контингент сифати ва сони ўзгариши асосан Ёкотадаги АҚШ қўшинлари базасига қаратилган. Бу базада айни дамда 54 мингдан ортиқ ҳарбий хизматчи мавжуд. Ёкотага АҚШ қуролли қисмлари 1960 йилдаги битимга асосан киритилган.
Кутилаётган қайта конфигурация Япония ўзининг мудофаа позициясини ўзгартириб, Иккинчи жаҳон урушидан кейин Қўшма Штатлар томонидан ўрнатилган пасифист конституциясидан воз кечишини англатади. Япония ҳукумати 2027 йилга бориб ҳарбий бюджетни ҳам ЯИМнинг 2 фоизигача оширишни мақсад қилган.
Изоҳ (0)