Жанубий Корея делегацияси 26 июль куни бўлиб ўтган Олимпия ўйинларида очилиш маросимида Шимолий Корея деб таништирилди. Бу ҳақда BBC нашри хабар берди.
Манбада айтилишича, эълон қилувчиларнинг қалтис хатоси туфайли расмийлар делегация номини адаштириб юборган. Оқибатда Сеулдан учиб келган спортчилар Шимолий Корея номи остида майдонга чиқиб келган.
Ташкилотчиларнинг эътиборсизлиги туфайли очилиш маросимида “Корея Халқ Демократик Республикаси” номи икки бор ишлатилган. Эълон қилувчилар икки корейс мамлакати учун битта ном қўллаган. Бу эса Сеул делегациясининг кескин норозилигига сабаб бўлган.
Олимпия ўйинлари очилиш маросимини ёритиб бораётган телеканалда эса давлат номлари тўғри қўлланган. Жиддий хатога йўл қўйган Олимпия ўйинлари ташкилотчилари эса Жанубий Корея спортчиларидан узр сўраб чиққан.
Жанубий Корея Спорт вазирлиги шармандали ҳолат юзасидан кескин баёнот берган. Йўл қўйилган хато учун Францияга ҳукумат даражасида жавоб қайтарилиши билдирилган.
Жанубий Корея спорт вазирининг иккинчи ўринбосари, оғир атлетика бўйича 2008 йилги Олимпия чемпиони Жанг Ми-Ран Олимпия қўмитаси президенти Томас Бах билан учрашишни талаб қилган. Унга жиддий эътирозлари борлигини билдирган.
“Очилиш маросимида Жанубий Корея делегациясини таништиришда йўл қўйилган хато учун чуқур узр сўраймиз. Жанубий Корея делегацияси аъзолари, Жанубий Корея Спорт вазирлиги ва тегишли ташкилотларга узримизни изҳор қиламиз”, дейилган Халқаро олимпия қўмитаси матбуот бўлими хабарида.
Маълумот ўрнида, Корея Республикаси бу йилги Олимпия ўйинларига 143 нафар спортчи жўнатган. Улар баҳсларда 21 та спорт тури бўйича беллашадилар. Шимолий Корея спортчилари эса 100 га яқин спортчи билан иштирок этиб, 2016 йилдан кейин илк бор халқаро ўйинларда қатнашмоқда.
Изоҳ (0)