Fransiya prezidenti Emmanuel Makron Olimpiada vaqtida tomonlarga “siyosiy sulh” taklif qilib, ayni paytda asosiy e’tibor siyosatga emas, sportga qaratilishi kerakligini ta’kidladi.
22-iyul, dushanba kuni Olimpiya qishlog‘iga tashrif buyurgan Makron Olimpiada “sport festivali” ekanini, siyosiy qarama-qarshiliklar vaqtincha bo‘lsa ham, to‘xtashi kerakligini aytdi.
“Olimpiada — mamlakat va dunyo hayotining asosiga aylanadigan o‘yinlardir”, dedi u jurnalistlarga.
Fransiya prezidentining ta’kidlashicha, iyun oyida Milliy assambleyaning tarqatib yuborilishi Olimpiadaga aslo salbiy ta’sir ko‘rsatmaydi. Avvalroq muxolifat bu borada Makronni ayblagan edi.
“Sulhga kelish bo‘yicha o‘zaro kelishuv bor”, dedi Makron. Fransiya prezidenti bu Olimpiya va Paralimpiya o‘yinlari tugaguncha yangi bosh vazirni tayinlamasligini anglatadimi yoki yo‘qmi, bunga aniqlik kiritmadi.
Avvalroq Makron bosh vazir Gabriel Attalning iste’fosini qabul qilib, xuddi shu tarkibdagi hukumat “joriy masalalar” bilan shug‘ullanishda davom etishini ta’kidlagan edi. Uning so‘zlariga ko‘ra, yangi bosh vazirni tanlash va Vazirlar mahkamasini shakllantirish vaqt talab etadi.
Shu bilan birga, so‘l blokdagi partiyalar o‘zaro kelishmovchilik tufayli ikki haftadan ortiq vaqtdan beri bosh vazir lavozimiga yagona nomzod ko‘rsata olmayapti.
Izoh (0)