Франция президенти Эммануэль Макрон Олимпиада вақтида томонларга “сиёсий сулҳ” таклиф қилиб, айни пайтда асосий эътибор сиёсатга эмас, спортга қаратилиши кераклигини таъкидлади.
22 июль, душанба куни Олимпия қишлоғига ташриф буюрган Макрон Олимпиада “спорт фестивали” эканини, сиёсий қарама-қаршиликлар вақтинча бўлса ҳам, тўхташи кераклигини айтди.
“Олимпиада — мамлакат ва дунё ҳаётининг асосига айланадиган ўйинлардир”, деди у журналистларга.
Франция президентининг таъкидлашича, июнь ойида Миллий ассамблеянинг тарқатиб юборилиши Олимпиадага асло салбий таъсир кўрсатмайди. Аввалроқ мухолифат бу борада Макронни айблаган эди.
“Сулҳга келиш бўйича ўзаро келишув бор”, деди Макрон. Франция президенти бу Олимпия ва Паралимпия ўйинлари тугагунча янги бош вазирни тайинламаслигини англатадими ёки йўқми, бунга аниқлик киритмади.
Аввалроқ Макрон бош вазир Габриэль Атталнинг истеъфосини қабул қилиб, худди шу таркибдаги ҳукумат “жорий масалалар” билан шуғулланишда давом этишини таъкидлаган эди. Унинг сўзларига кўра, янги бош вазирни танлаш ва Вазирлар маҳкамасини шакллантириш вақт талаб этади.
Шу билан бирга, сўл блокдаги партиялар ўзаро келишмовчилик туфайли икки ҳафтадан ортиқ вақтдан бери бош вазир лавозимига ягона номзод кўрсата олмаяпти.
Изоҳ (0)