Isroil armiyasi 14-iyul kuni G‘azo janubiga bergan zarbalar oqibatida halok bo‘lgan falastinliklar soni 90 nafarga yetgan. Bu haqda CNN nashri xabar berdi.
Manbada aytilishicha, hujum G‘azo janubidagi Al-Mavasi aholi punkti hududida amalga oshirilgan. Hududda HAMAS harbiy qo‘mondoni yashab kelayotganidan xabar topgan Isroil aviatsiyasi ogohlantirmasdan hujumni amalga oshirgan.
Aholi hududiga seriyali va keng miqyosdagi zarbalar oqibatida 90 nafarga yaqin aholi vakili halok bo‘lgan. Ularning ko‘pchiligi sharqiy hududlardan favqulodda vaziyat sababli ko‘chirib kelingan bo‘lgan.
Isroil mudofaa kuchlari maʼmuriyati hujum oqibatida HAMAS harbiy qanoti hisoblangan “Al-Qassam” brigadalari rahbari Muhammad Daif va Xon Yunis brigadasi boshlig‘i Rafa Salama yo‘q qilinganini xabar qilgan. Qochqinlar lageriga hujumdan maqsad ham shu ikki shaxsni yo‘q qilish bo‘lgani aytilgan.
“Al-Qassam” brigadalari rahbari Muhammad Daif Isroil tomonidan 7-oktyabrdagi hujumlarni tashkil etishda ayblangan. Uning faoliyatida sherik bo‘lgan yana 10 ga yaqin HAMAS vakillari qidiruvga berilgan.
BMTning Falastinlik qochqinlar bo‘yicha agentligi UNRWA’ning yuqori martabali xodimi zarba qurbonlarini qabul qilgan Nosir kasalxonasini “G‘azodagi to‘qqiz oy davomida ko‘rilgan eng dahshatli manzaralar” deya taʼriflagan. Kasalxonada elektr va yoqilg‘i, xodimlar yetishmasligi oqibatida bemorlarning ko‘pchiligi birinchi yordam ko‘rsatishga ulgurmay vafot etgan.
Isroil bosh vaziri Binyamin Netanyaxu Tel-Avivda o‘tkazilgan matbuot anjumanida Daif va uning o‘rinbosari o‘ldirilganiga ishonchi komil emasligini aytgan. Chunki o‘ldirilgani iddao qilingan qo‘mondonning jasadi hozircha aniqlanmagan. Hududda vayrongarchilik ko‘lami yuqori bo‘lib, bino qoldiqlari orasidan jasadlarni aniqlash imkonsiz bo‘lgan.
G‘azo Sog‘liqni saqlash vazirligi kamida 300 kishi yaralangani haqida xabar bergan. Halok bo‘lganlarning yarmi ayollar va bolalar bo‘lgan.
Izoh (0)