Исроил армияси 14 июль куни Ғазо жанубига берган зарбалар оқибатида ҳалок бўлган фаластинликлар сони 90 нафарга етган. Бу ҳақда CNN нашри хабар берди.
Манбада айтилишича, ҳужум Ғазо жанубидаги Ал-Маваcи аҳоли пункти ҳудудида амалга оширилган. Ҳудудда ҲАМАС ҳарбий қўмондони яшаб келаётганидан хабар топган Исроил авиацияси огоҳлантирмасдан ҳужумни амалга оширган.
Аҳоли ҳудудига серияли ва кенг миқёсдаги зарбалар оқибатида 90 нафарга яқин аҳоли вакили ҳалок бўлган. Уларнинг кўпчилиги шарқий ҳудудлардан фавқулодда вазият сабабли кўчириб келинган бўлган.
Исроил мудофаа кучлари маъмурияти ҳужум оқибатида ҲАМАС ҳарбий қаноти ҳисобланган “Ал-Қассам” бригадалари раҳбари Муҳаммад Даиф ва Хон Юнис бригадаси бошлиғи Рафа Салама йўқ қилинганини хабар қилган. Қочқинлар лагерига ҳужумдан мақсад ҳам шу икки шахсни йўқ қилиш бўлгани айтилган.
“Ал-Қассам” бригадалари раҳбари Муҳаммад Даиф Исроил томонидан 7 октябрдаги ҳужумларни ташкил этишда айбланган. Унинг фаолиятида шерик бўлган яна 10 га яқин ҲАМАС вакиллари қидирувга берилган.
БМТнинг Фаластинлик қочқинлар бўйича агентлиги UNRWA’нинг юқори мартабали ходими зарба қурбонларини қабул қилган Носир касалхонасини “Ғазодаги тўққиз ой давомида кўрилган энг даҳшатли манзаралар” дея таърифлаган. Касалхонада электр ва ёқилғи, ходимлар етишмаслиги оқибатида беморларнинг кўпчилиги биринчи ёрдам кўрсатишга улгурмай вафот этган.
Исроил бош вазири Биньямин Нетаньяху Тель-Авивда ўтказилган матбуот анжуманида Даиф ва унинг ўринбосари ўлдирилганига ишончи комил эмаслигини айтган. Чунки ўлдирилгани иддао қилинган қўмондоннинг жасади ҳозирча аниқланмаган. Ҳудудда вайронгарчилик кўлами юқори бўлиб, бино қолдиқлари орасидан жасадларни аниқлаш имконсиз бўлган.
Ғазо Соғлиқни сақлаш вазирлиги камида 300 киши яралангани ҳақида хабар берган. Ҳалок бўлганларнинг ярми аёллар ва болалар бўлган.
Изоҳ (0)