Nigeriyada 12-iyul kuni ikki qavatli maktab binosi qulashi oqibatida kamida 22 kishi halok bo‘ldi. Bu haqda Reuters xabar berdi.
Halokat Nigeriya markazidagi Plato shtatida ro‘y bergan. Eski va yaroqsiz holatga kelib qolgan maktab binosi devorlari darz ketib yorilishi oqibatida qulab tushgan.
Hodisa paytida bino ichida bo‘lgan jami 154 kishi vayronalar ostida qolib ketgan. Fuqarolarning ko‘pchiligi tasodif tufayli omon qolgan. Ular qutqarilib, zudlik bilan kasalxonalarga olib ketilgan.
30 nafar fuqaro o‘ta og‘ir jarohat bilan shifoxonada qolayotgani bildirilgan. Nigeriya Milliy favqulodda vaziyatlar agentligi halokat joyida qutqaruv ishlari yakunlangani va vayronalar tozalanayotganini bildirgan.
Plato shtati rahbariyati voqea yuz bergan Jos tumanidagi boshqa taʼlim muassasalari holatini ham tekshiruvdan o‘tkazgan. Busa Buji jamoasiga tegishli, Saint akademiyasi qaramog‘idagi maktabning binosi qulashi oqibatida halok bo‘lganlarning oila aʼzolariga hamdardlik bildirilgan.
Baxtsiz hodisaning yuz berishiga inshootning juda uzoq muddat xizmat qilgani hamda taʼmirlanmagani sabab bo‘lgan. Afrikaning aholi eng zich joylashgan mamlakatida xavfsizlik qoidalarining pastligi va ko‘pincha sifatsiz qurilish materiallari tufayli binolar qulashi tez-tez uchrab turadi.
Izoh (0)