Нигерияда 12 июль куни икки қаватли мактаб биноси қулаши оқибатида камида 22 киши ҳалок бўлди. Бу ҳақда Reuters хабар берди.
Ҳалокат Нигерия марказидаги Плато штатида рўй берган. Эски ва яроқсиз ҳолатга келиб қолган мактаб биноси деворлари дарз кетиб ёрилиши оқибатида қулаб тушган.
Ҳодиса пайтида бино ичида бўлган жами 154 киши вайроналар остида қолиб кетган. Фуқароларнинг кўпчилиги тасодиф туфайли омон қолган. Улар қутқарилиб, зудлик билан касалхоналарга олиб кетилган.
30 нафар фуқаро ўта оғир жароҳат билан шифохонада қолаётгани билдирилган. Нигерия Миллий фавқулодда вазиятлар агентлиги ҳалокат жойида қутқарув ишлари якунлангани ва вайроналар тозаланаётганини билдирган.
Плато штати раҳбарияти воқеа юз берган Жос туманидаги бошқа таълим муассасалари ҳолатини ҳам текширувдан ўтказган. Буса Бужи жамоасига тегишли, Саинт академияси қарамоғидаги мактабнинг биноси қулаши оқибатида ҳалок бўлганларнинг оила аъзоларига ҳамдардлик билдирилган.
Бахтсиз ҳодисанинг юз беришига иншоотнинг жуда узоқ муддат хизмат қилгани ҳамда таъмирланмагани сабаб бўлган. Африканинг аҳоли энг зич жойлашган мамлакатида хавфсизлик қоидаларининг пастлиги ва кўпинча сифатсиз қурилиш материаллари туфайли бинолар қулаши тез-тез учраб туради.
Изоҳ (0)