Isroil hujumi ro‘y bergan G‘azo shahri sharqidagi vayronalar ostidan 11-iyul kuni 60 ga yaqin jasad topilgan. Bu haqda G‘azo fuqarolik mudofaasi agentligi tarqatgan xabarga asoslanib, Al Arabiya nashri maʼlum qildi.
Jasadlar G‘azo shahri sharqidagi Shujayya aholi punkti hududidan topilgan. Bu maʼlumotni Isroil harbiylari ham tasdiqlagan.
Sharqiy Shujayya tumanida so‘nggi ikki hafta davomida faol janglar, portlashlar sodir etilgan. Isroil hududda Falastin qarshilik kuchlari aʼzolari joylashganini sabab qilib, umumiy havo hujumlari tashkil etgan.
G‘azo fuqarolik mudofaasi agentligining maʼlum qilishicha, Isroilning Shujayyadagi amaliyotlari oqibatida hududdagi 300 dan ortiq turar joy binosi vayron bo‘lgan. 100 dan ortiq korxona ishlab chiqarishni to‘xtatgan.
Shujayyada yashovchi Muhammad Nairiyning aytishicha, u va boshqalar harbiy operatsiyadan so‘ng uylariga qaytishganda butun aholi punktining buzib tashlanganiga guvoh bo‘lishgan. Vayronalar tekshirilganda esa ularning ostida jasadlar borligi maʼlum bo‘lgan.
10-iyul kuni Isroil armiyasi ikki haftalik amaliyotdan so‘ng G‘azo sharqini tark etgan. Tanklar va qurolli qismlar G‘azo shahrining boshqa qismiga ko‘chib o‘tgan.
Xorijiy nashrlar G‘azoning Tel al-Hava hududida Falastin qarshilik kuchlari va Isroil harbiylari o‘rtasida og‘ir to‘qnashuvlar davom etayotganini yozgan. Qarshilik kuchini sindirish uchun Isroil aviatsiyasi Sabra aholi punktidagi qator obyektlarga bombalar tashlagan.
Izoh (0)