BMT 11-iyul kuni Rossiyaga murojaat yo‘llab, askarlarini Zaporojye AESdan olib chiqishni va yadroviy platforma nazoratini Kiyevga topshirishni talab qildi. Bu haqda Reuters nashri xabar berdi.
BMT Bosh assambleyasi payshanba kuni Rossiyadan Zaporojye atom elektr stansiyasidan “o‘z harbiylari va boshqa ruxsat etilmagan xodimlarini zudlik bilan olib chiqib ketish”ni talab qilib rezolyutsiya eʼlon qilgan. AES nazorati to‘liq Kiyevga topshirilishi qatʼiy uqtirilgan.
193 aʼzodan iborat Bosh assambleyada 99 mamlakat BMT qarorini yoqlab ovoz bergan. 9 nafari qarshi, 60 nafar aʼzo betaraf pozitsiyada qolgan.
Yevropadagi eng yirik hisoblangan Zaporojye AES 2022-yilning fevralida Rossiya nazoratiga o‘tgan. AES hozirda yopiq, biroq undagi yadroviy massani past haroratda saqlash va parchalanishning oldini olish uchun tashqi quvvat manbasi talab etilmoqda.
BMTda ovoz berishdan oldin nutq so‘zlagan Ukrainaning BMTdagi elchisi Sergey Kislitsa mamlakatlarni rezolyutsiyani yoqlab ovoz berishga chaqirgan. Shu yo‘l bilan ulkan halokatning oldi olinishi bildirilgan.
“Biz bu borada kelajak avlodlar oldida qarzdormiz. Yadroviy ofatlar dahshatlari takrorlanmasligini taʼminlashimiz kerak”, degan Ukraina rasmiysi.
Rossiya rasmiylari AESda xavfsizlik bilan bog‘liq vaziyat joyida ekanini bildirgan. Inshootni Ukrainaga qaytarish masalasi esa aslo ko‘rib chiqilmasligi xabar qilingan.
Izoh (0)