Sudyalar oliy maktabining sudyalik lavozimlariga nomzodlarni tayyorlash bo‘yicha kursiga 2024/2025-o‘quv yili uchun xotin-qizlar uchun 20 ta qo‘shimcha kvota belgilandi.
O‘zbekiston Sudyalar oliy kengashi huzuridagi Sudyalar oliy maktabining sudyalik lavozimlariga nomzodlarni tayyorlash kursiga qabul 7-maydan boshlandi. Fuqarolik, jinoyat, iqtisodiy va ma’muriy huquq ixtisosliklari bo‘yicha sudyalik lavozimlariga nomzodlarni tayyorlash kursi bir yillik magistratura ta’lim dasturi bo‘yicha davlat grantlari asosida amalga oshiriladi.
Tayyorlash kursiga 34 yoshdan kichik bo‘lmagan (shuningdek, 2024-yilning 31-dekabrigacha 34 yoshga to‘ladigan), oliy yuridik ma’lumotga va yuridik ixtisosligi bo‘yicha kamida yillik ish stajiga ega bo‘lgan O‘zbekiston fuqarolari qabul qilinadi.
Sudyalar oliy maktabi direktori o‘rinbosari Dilshod Isroilovning “Daryo” muxbiriga ma’lum qilishicha 2024/2025-o‘quv yili uchun 160 ta qabul kvotasi belgilandi.
Shundan:
- jinoyat huquqi yo‘nalishi bo‘yicha 70 ta,
- fuqarolik huquqi yo‘nalishi bo‘yicha 40 ta,
- iqtisodiy huquq yo‘nalishi bo‘yicha 15 ta,
- ma’muriy huquq yo‘nalishi bo‘yicha 15 ta.
Bundan tashqari, xotin-qizlar uchun 20 ta qo‘shimcha kvota (har bir sud yo‘nalishi bo‘yicha 5 tadan) belgilandi.
2024-yil 4-iyun holatga ko‘ra, jami 589 nafar talabgor hujjat topshirgan. Ularning 322 nafari jinoyat huquqi, 121 nafari fuqarolik, 87 nafari, iqtisodiy va 59 nafari ma’muriy huquq yo‘lanishda tahsil olish istagini bildirgan. Hududlar kesimida olinadigan bo‘lsa, eng ko‘p talabgorlar Toshkent shahri, Samarqand, Farg‘ona va Andijon viloyatlariga to‘g‘ri kelmoqda. Jizzax, Navoyi va Sirdaryo viloyatlari misolida buning aksi kuzatilmoqda.
Talabgorlarning 339 nafari sud tizimi, 47 nafari adliya, 52 nafari ichki ishlar, 22 nafari prokuratura organlarida, 36 nafari advokatura tizimida faoliyat ko‘rsatib kelayotgan mutaxassislar hisoblanadi.
Ma’lumot uchun, talabgorlardan hujjatlar 7-iyungacha (shuni kuni ham) qabul qilinadi.
Izoh (0)