Судьялар олий мактабида судьялик лавозимига номзодларни тайёрлаш курси тингловчилари якуний давлат аттестация синовлари топширмоқда. Бу ҳақда Судьялар олий кенгаши ахборот хизмати “Дарё”га маълум қилди.
Судьялар олий мактаби директори ўринбосари Дилшод Исроиловнинг айтишича, 2023—2024-ўқув йилида Кенгаш ҳузуридаги Судьялар олий мактабининг судьялик лавозимларига тайёрлаш курсига 153 нафар тингловчи қабул қилинган бўлиб, уларнинг 48 нафари жиноят ҳуқуқи, 47 нафари фуқаролик ҳуқуқи, 30 нафари иқтисодий ҳуқуқ ва 28 нафари маъмурий ҳуқуқ ихтисослиги бўйича таҳсил олди.
“Куни кеча маъмурий ҳуқуқ ихтисослиги бўйича таҳсил олган 28 нафар тингловчиларнинг барчаси якуний давлат аттестация синовларидан муваффақиятли ўтди. Айни кунларда жиноят, фуқаролик ва иқтисодий ҳуқуқ ихтисослиги бўйича таҳсил олган тингловчилар шундай синовдан ўтказилмоқда.
Якуний давлат аттестация синовларидан муваффақиятли ўтган тингловчиларга тегишли диплом берилади ва улар илк бор судьялик лавозимига тайинланиш учун Судьялар олий кенгашининг очиқ танловида иштирок этиш ҳуқуқига эга бўлади”, дейди Дилшод Исроилов.
Қўшимча қилинишича, ўтган уч йилда Судьялар олий мактабининг Судьялик лавозимига номзодларни тайёрлаш курсида 345 нафар тингловчи таҳсил олган бўлса, уларнинг 323 нафари (93,6 фоизи) судьялик лавозимларига тайинланган.
Маълумот учун, Судьялар олий мактаби судьялик лавозимларига номзодларни тайёрлаш, судьялар ва судлар аппарати ходимларини қайта тайёрлаш, уларнинг малакасини оширувчи давлат таълим ва илмий-тадқиқот муассасаси ҳисобланади.
Изоҳ (0)