Хитой ва Беларусь ҳукуматлари НАТО чегарасига яқин ҳудудда қўшма ҳарбий машғулотлар амалга оширади. Бу ҳақда Беларусь Мудофаа вазирлиги тарқатган хабарга асосланиб, CNN нашри хабар берди.
Манбада келтирилишича, машғулотлар Польша чегарасидан бир неча чақирим масофада ўтказилади. Уларда қўшни мамлакат чегара ва ҳаво ҳудудини бузувчи ҳаракатлар содир этилишига йўл қўйилмайди.
Беларусь Мудофаа вазирлиги Хитой Халқ озодлик армияси қўшинлари Беларусга етиб келганини тасдиқлаган. Улар иштирокидаги ҳарбий манёврлар 8 июлдан 19 июлгача қадар, қарийб 11 кун давом этиши айтилган.
7 июль куни Хитой Мудофаа вазирлиги Беларусь билан қўшма операциялар юзасидан қисқа баёнот эълон қилган. Унда айтилишича, машғулотлар “гаровга олинганларни қутқариш шартли операциялари ва терроризмга қарши миссиялар”ни ўз ичига олади.
“Ўқув машғулотларида қатнашувчи қўшинларнинг тайёргарлик даражаси ва мувофиқлаштириш имкониятларини ошириш, шунингдек, икки давлат армиялари ўртасидаги амалий ҳамкорликни чуқурлаштиришга қаратилган”, — дея қўшимча қилинган Хитой вазирлиги хабарда.
Ҳарбий машқлар Беларусь-Польша чегарасидаги Брест шаҳри яқинида ўтказилиши белгиланган. Ҳарбий полигон Польша пойтахти Варшавадан 209 километр ва Минскнинг Украина билан чегарасидан 64 километр узоқликда жойлашган.
Беларусь 4 июль куни расман ШҲТга аъзо бўлган эди. Бу эса унинг Хитой билан алоқаларига мантиқий ва қонуний тус берган. Ҳамкорлик доирасидаги биринчи амалий қадамлар ўлароқ қўшма ҳарбий машғулотлар ташкил этилган.
НАТО раҳбарлари Беларусь ва Хитой ҳаракатларини провокация сифатида қоралаган. Ушбу машғулотлар альянс чегараси ортида қўрқув ва ваҳима келтириб чиқариш учун ташкил қилингани айтилган.
Изоҳ (0)