Namanganda XI va XIV asrga oid noyob qilich, Baqtriya va Xitoy tangalari, Abu Nasr Forobiy qalamiga mansub nodir kitob topildi. Bu haqda Namangan viloyati hokimligi matbuot xizmati xabar berdi.
Qayd etilishicha, Axsikent arxeologiya parki tarkibidagi Yangi Axsi majmuasidagi bebaho eksponatlar soni yana o‘n adadga ortgan. Mutaxassislar tomonidan XI asrga oidligi aytilayotgan qilich jangdan chiqqan holatda saqlangan. U qattiq po‘latdan Axsikent temirchilari tomonidan yasalgan. Dunyo po‘lat markazi sifatida tan olingan Axsikentning yumshoq va qattiq po‘lati mashhur. Uning qanday yaratilishi esa hozirgacha sir.
Ikkinchi aslaha esa XIV asrga oid bo‘lib, uni Amir Temurning xos askarlari ishlatgan. Baqtriya tangasi 475—600-yillarga oid. Xitoy tangasi esa XIX asrga oid bo‘lib, uni tarixchi olim Sherali Qo‘ldoshev batafsil tadqiq etgan.
Tanganing o‘ng tomonidagi ikki iyeroglif: Kashi / Kashi — Qashqar. Chap tomonidagi ikki iyeroglif : san / san — va jir / jin — oltin, deb yozilgan. Tanganing tepa qismidagi bir iyeroglif: guang / guang — yorug‘lik maʼnosini beradi. Past qismidagi bir iyeroglif: yuan / yuan — yumaloq, yaʼni doira degan maʼnoni beradi. Tanganing o‘rtasidagi teshilgan joyidagi iyeroglifni o‘qish qiyin. Biroq u shyuy iyeroglifini bildiryapti. Chunki Gaungshyuy / Guangxu — nomiga o‘xshayapti. U 1875—1908-yillarda Xitoyni boshqargan, deydi Sherali Qo‘ldoshev.
Uchta nodir kitob esa ilm-maʼrifatga, falsafa va tarixga oid bo‘lib, unda noyob ilm bitilgan.
Eslatib o‘tamiz, 2023-yilda Namangan viloyatida 1,5 ming yillik noyob tangalar topilgan edi. Undan oldin esa Axsikent shahar xarobasidan noyob tangalar, Qoraxoniylar davriga oid devoriy suratlar va ming yillik Damashq qilichlari topilgani to‘g‘risida xabar berilgandi.
Izoh (0)