Surxondaryo viloyatining Sariosiyo tumanida temuriylar davriga oid mis tangalar topildi. Bu haqda “Daryo”ga jurnalist Sarvar To‘rayev ma’lum qildi.
Viloyatning Sariosiyo tumani “Alisher Navoiy” mahallasida yashovchi mahalliy aholi To‘polondaryo yoqasidan qadimiy tangalar topib, bu haqda tuman hokimligiga ma’lum qilgan.
“To‘polondaryo Janubiy Hisor tog‘ tizmasidan boshlanuvchi yirik suv sig‘imiga ega daryo bo‘lib, Sariosiyo tumanining ‘Alisher Navoiy’ mahallasi hududiga yetib kelganda ancha sayozlashadi. Daryo ayni kunda butunlay qurib qolgani bois, shu mahallada yashovchi aholi daryodan tosh olib chiqib, qurilishda foydalanadi. Shunday kunlarning birida odamlar toshlar orasidan tangalar topib olgan”, — deydi Turizm va madaniy meros vazirligi huzuridagi madaniy meros agentligi rahbari o‘rinbosari Tursunali Qo‘ziyev.
Tursunali Qo‘ziyev Sariosiyodan topilgan mis tanga pullar 1420—1436-yillarda Samarqandda zarb qilinganini aytmoqda.
“Bu mis tangalarning metall sifatida ahamiyati kam bo‘lishi mumkin, ammo tarixiy ahamiyati yuqori. Aslida, temuriylar, xususan, Mirzo Ulug‘bek davrida zarb qilingan bu kabi tanga pullar ko‘p topiladi. Lekin, bu mis tanga pullar anchagina yaxshi saqlangan ekan. Daryo qirg‘og‘idan topilgan bu tangalar Ulug‘bek hukmronligining turli davrlarida 1420—1436-yillar oralig‘ida Samarqandda zarb qilingan. Tangalarda olti qirrali yulduz va turli astronomik belgilar aks etgan. Bu hukmdorning o‘zi bevosita ushbu tangalarni zarb etishda bosh-qosh bo‘lganligi, o‘sha davrda matematika va astronomiya yuqori darajada rivojlanganligini ko‘rsatadi. Tangalar yuza qismida zarb qilingan joy nomi ‘Samarqand’, shuningdek, ‘adliya’, ya’ni ‘adolat’ so‘zi aks etgan”, — deydi madaniy meros agentligi mas’uli.
Izoh (0)