Наманганда XI ва XIV асрга оид ноёб қилич, Бақтрия ва Хитой тангалари, Абу Наср Форобий қаламига мансуб нодир китоб топилди. Бу ҳақда Наманган вилояти ҳокимлиги матбуот хизмати хабар берди.
Қайд этилишича, Ахсикент археология парки таркибидаги Янги Ахси мажмуасидаги бебаҳо экспонатлар сони яна ўн ададга ортган. Мутахассислар томонидан XI асрга оидлиги айтилаётган қилич жангдан чиққан ҳолатда сақланган. У қаттиқ пўлатдан Ахсикент темирчилари томонидан ясалган. Дунё пўлат маркази сифатида тан олинган Ахсикентнинг юмшоқ ва қаттиқ пўлати машҳур. Унинг қандай яратилиши эса ҳозиргача сир.
Иккинчи аслаҳа эса XIV асрга оид бўлиб, уни Амир Темурнинг хос аскарлари ишлатган. Бақтрия тангаси 475—600 йилларга оид. Хитой тангаси эса ХIX асрга оид бўлиб, уни тарихчи олим Шерали Қўлдошев батафсил тадқиқ этган.
Танганинг ўнг томонидаги икки иероглиф: Каши / Каши — Қашқар. Чап томонидаги икки иероглиф : сан / сан — ва жир / жин — олтин, деб ёзилган. Танганинг тепа қисмидаги бир иероглиф: гуанг / гуанг — ёруғлик маъносини беради. Паст қисмидаги бир иероглиф: юан / юан — юмалоқ, яъни доира деган маънони беради. Танганинг ўртасидаги тешилган жойидаги иероглифни ўқиш қийин. Бироқ у шюй иероглифини билдиряпти. Чунки Гаунгшюй / Гуангху — номига ўхшаяпти. У 1875—1908 йилларда Хитойни бошқарган, дейди Шерали Қўлдошев.
Учта нодир китоб эса илм-маърифатга, фалсафа ва тарихга оид бўлиб, унда ноёб илм битилган.
Эслатиб ўтамиз, 2023 йилда Наманган вилоятида 1,5 минг йиллик ноёб тангалар топилган эди. Ундан олдин эса Ахсикент шаҳар харобасидан ноёб тангалар, Қорахонийлар даврига оид деворий суратлар ва минг йиллик Дамашқ қиличлари топилгани тўғрисида хабар берилганди.
Изоҳ (0)