Germaniyaning “Shtutgart” klubi markaziy himoyachisi Valdemar Anton Dortmundning “Borussiya” klubiga o‘tdi. Bu haqda Dortmund rasmiy sayti xabar bermoqda. Futbolchi bilan shartnoma 2028-yilning yoziga qadar mo‘ljallangan.
Avvalroq “Borussiya” Valdemar Antonning shartnomasini “Shtutgart”dan 22,5 million yevro tovon puli to‘lab sotib olgani xabar qilingandi. Ma’lumotlarga qaraganda, 27 yoshli markaziy himoyachi Mats Hummelsning o‘rnini to‘ldira olishiga klubning barcha egalari ishonmoqda.
Valdemar Anton o‘tgan mavsumda klub safida barcha turnirlarda 37 ta o‘yin o‘tkazib, bitta gol urgan va 4 golga assistentlik qilgan. Transfermarkt portalida berilgan ma’lumotlarga ko‘ra, futbolchining bozor qiymati 20 million yevroni tashkil qiladi.
27 yoshli Valdemar Anton Toshkent viloyatining Olmaliq shahrida tug‘ilgan. Futbolchi avvalroq ota-onasi O‘zbekistonda tug‘ilgani, keyinchalik Germaniyaga ko‘chib o‘tgani haqida ma’lum qilgandi. Antonning so‘zlariga ko‘ra, uning bobosi va buvisi o‘zbek tilida gaplashgan, ota-onasi esa rus tilida muloqot qilgan.
Valdemar Anton Yevropa chempionatida Germaniya sharafini himoya qildi. Guruh o‘yinlarida maydonga tushmagan futbolchi, chempionatda Daniya bilan o‘yinning 88-daqiqasida o‘z debyutini o‘tkazdi. Germaniya terma jamoasi musobaqa bilan xayrlashgan uchrashuvda ham futbolchi so‘nggi daqiqalarda tarkibga qo‘shildi.
Izoh (0)