“Real” klubi dunyoning eng iqtidorli yosh himoyachilaridan biri bilan shartnoma imzolashga yaqin

Madridning “Real” klubi “Lill” himoyachisi Leni Yoroni sotib olishga yaqin turibdi, deb xabar beradi Mundo Deportivo.

Manbaga ko‘ra, “Lill” Yoroning transferi uchun 40 million yevro olish niyatida, ammo “Real” futbolchi bilan kelishuvga erishgan va atigi 20 million yevro taklif qilishga tayyor.

Klublar o‘rtasidagi yakuniy kelishuv yaqin haftalarda e’lon qilinishi kutilmoqda.

Avvalroq “PSJ” himoyachini o‘z safiga qo‘shib olishga urinayotgani haqida ma’lumot bor, ammo u “qirollik klubi”ga o‘tishni xohlamoqda.

Ma’lumot uchun, o‘tgan mavsumda Yoro barcha turnirlarda 44 ta o‘yinda qatnashib, uchta gol urgan. Futbolchining klub bilan amaldagi mehnat shartnomasi 2025-yilning yoziga qadar amal qiladi. Transfermarkt portalida berilgan ma’lumotlarga ko‘ra, futbolchining bozor qiymati 50 million yevroni tashkil qiladi.