Германиянинг “Штутгарт” клуби марказий ҳимоячиси Валдемар Антон Дортмунднинг “Боруссия” клубига ўтди. Бу ҳақда Дортмунд расмий сайти хабар бермоқда. Футболчи билан шартнома 2028 йилнинг ёзига қадар мўлжалланган.
Аввалроқ “Боруссия” Валдемар Антоннинг шартномасини “Штутгарт”дан 22,5 миллион евро товон пули тўлаб сотиб олгани хабар қилинганди. Маълумотларга қараганда, 27 ёшли марказий ҳимоячи Матс Ҳуммелснинг ўрнини тўлдира олишига клубнинг барча эгалари ишонмоқда.
Валдемар Антон ўтган мавсумда клуб сафида барча турнирларда 37 та ўйин ўтказиб, битта гол урган ва 4 голга ассистентлик қилган. Transfermarkt порталида берилган маълумотларга кўра, футболчининг бозор қиймати 20 миллион еврони ташкил қилади.
27 ёшли Валдемар Антон Тошкент вилоятининг Олмалиқ шаҳрида туғилган. Футболчи аввалроқ ота-онаси Ўзбекистонда туғилгани, кейинчалик Германияга кўчиб ўтгани ҳақида маълум қилганди. Антоннинг сўзларига кўра, унинг бобоси ва бувиси ўзбек тилида гаплашган, ота-онаси эса рус тилида мулоқот қилган.
Валдемар Антон Европа чемпионатида Германия шарафини ҳимоя қилди. Гуруҳ ўйинларида майдонга тушмаган футболчи, чемпионатда Дания билан ўйиннинг 88-дақиқасида ўз дебютини ўтказди. Германия терма жамоаси мусобақа билан хайрлашган учрашувда ҳам футболчи сўнгги дақиқаларда таркибга қўшилди.
Изоҳ (0)