Toshkent shahriga xizmat ko‘rsatuvchi oqova suv tozalash inshootlari holatini yaxshilash va oqova suvlarga zararli tashlamalar oqizilishini to‘xtatish bo‘yicha Idoralararo ishchi guruhi tuzildi, deb xabar bermoqda “O‘zsuvta’minot” matbuot xizmati.
Qayd etilishicha, so‘nggi yillarda oqova suv inshootlari faoliyatidan haqli tarzda norozi bo‘lib murojaat qilayotganlarning soni ortdi. Chunki, bugun oqova suv tarmoqlariga (kanalizatsiya) tashlanayotgan sanoat chiqindilari va ularda kelayotgan zararli kimyoviy moddalar miqdori keskin oshdi. Oqova suv inshootlarining texnik, texnologik imokoniyatlariga to‘g‘ri kelmaydigan bunday yuklamalar esa tozalash jarayonlarining izdan chiqishiga hamda turli sanitariya va ekologiyaga oid salbiy vaziyatlarning yuzaga kelishiga sabab bo‘lmoqda.
Bu kabi holatlarning oldini olish, aholini norozi qilayotgan noxushliklarga barham berish maqsadida turli chora-tadbirlar qo‘llanildi, so‘nggi chora sifatida korxonalarni oqova suv tarmoqlaridan uzishgacha borildi. Biroq bu kabi sa’y-harakatlar bir tarafning manfaatiga xizmat qilsa, albatta, ikkinchi tarafning noroziligiga sabab bo‘ldi.
Endilikda bugungi vaziyat ushbu yo‘nalishdagi ishlarni yanada takomillashtirishni taqozo etmoqda. Shundan kelib chiqib, Toshkent shahriga xizmat ko‘rsatuvchi oqova suv tozalash inshootlari holatini yaxshilash va oqova suvlarga zararli tashlamalar oqizilishini to‘xtatish bo‘yicha idoralararo ishchi guruhi tuzildi va uning vazifalari belgilandi.
Unga ko‘ra endilikda suv va oqova suvlarni tozalash inshootlarida joriy holatni, texnologik jarayonlarga rioya etilish darajasini hamda ularni takomillashtirish, ichimlik suv ta’minoti va oqova suvlarni tozalash tizimlarida kompleks avtomatlashtirilgan monitoring mexanizimi taklifi ishlab chiqiladi. Tadbirkorlik subyektlarini lokal suv tozalash inshootlarini qurish va modernizatsiya qilishga rag‘batlantirish maqsadida ushbu xarajatlarni subsidiyalash tizimi joriy etiladi.
Xo‘jalik yurituvchi subyektlar tomonidan ekologik me’yorlarga rioya etilishini samarali nazorat qilish va tabiatga sanoat faoliyatining zararli va zaharli tashlamalar shaklidagi salbiy ta’sirini oldini olish maqsadida atmosfera va suvga tashlamalarni tekshirish tartibi takomillashtiriladi. Bundan tashqari ishchi guruh zimmasiga yana qator vazifalar yuklatildi.
Qurilish va uy-joy kommunal xo‘jaligi, Suv xo‘jaligi, Ekologiya va atrof-muhitni muhofaza qilish va iqlim o‘zgarishi, Adliya, Raqamli texnologiyalar vazirliklari, shuningdek, Sanitariya-epidemiologik osoyishtalik va jamoat salomatligi qo‘mitasi, Toshkent shahar hokimligi, “O‘zsuvta’minot” AJ kabilar belgilangan vazifalarni to‘la bajarilishida o‘zlariga tegishli bo‘lgan jihatlarni ta’minlashni o‘z zimmasiga oladi.
Jarayonlar nazorati esa Bosh prokuratura tomonidan olib boriladi.
Izoh (0)